پەیامی کورد     ...    سەرۆك بارزانی پێشوازی لە باڵیۆزی ئەمریكا لە عێراق دەكات

ئەمڕۆ سێشەممە 10ـی ئابی 2021 لە سەلاحەددین سەرۆك مەسعوود بارزانی پێشوازی لە ماتیۆ تولەر باڵیۆزی ئەمریكا لە عێراق كرد.

لە دیدارەكەدا كە ڕۆبێرت پالادینۆ كونسووڵی ئەمریكا لە هەولێریش ئامادە بوو، باڵیۆزی ئەمریكا لە عێراق ستاییشی فەرهەنگی پێكەوەژیان و تەبایی نێوان پێكهاتە ئایینی و جیاجیاكانی هەرێمی كوردستانی كرد و دەستخۆشی لە دامودەزگا و دامەزراوەكانی هەرێم كرد بۆ پاراستنی ئەو پێكەوەژیانەی لە هەرێمی كوردستاندا هەیە.

لەو دانیشتنەدا رەهەندە گشتییەكانی دیالۆگی ستراتیژیی نێوان ئەمریكا و عێراق تاوتوێ كرا و باڵیۆزی ئەمریكا لە عێراق پابەندبوونی ووڵاتەكەی بە یارمەتیدانی عێراق و هەرێمی كوردستان و هەروەها پاڵپشتیكردنی هێزی پێشمەرگەی كوردستان و برەودانی پەیوەندی نێوان ووڵاتەكەی و هەرێمی كوردستان لە بوارەكانی كولتووری و ئاكادیمی و ئابووری دووپات كردەوە.

هەر لەو كۆبوونەوەیەدا ڕۆشنایی خرایە سەر پڕۆسەی سیاسی و ژیان و باری گوزەرانی هاووڵاتیانی عێراق و تەحەددیاتی بەردەم هەڵبژاردنەكانی داهاتووی عێراق و، هەروەها بیروڕاش لەبارەی قۆناغی دوای هەڵبژاردنەكانی عێراق و پەیوەندی نێوان لایەنە كوردستانییەكان و لایەنە عێراقییەكان ئاڵوگۆڕ كرا.

ئەم بابەتە 11988 جار خوێندراوەتەوە