پەیامی کورد     ...    سەرۆك بارزانی پێشوازی لە وەزیری بەرگری توركیا دەكات

ڕۆژی سێشەممە 19ـی 1ـی 2021 لە سەلاحەددین سەرۆك مەسعوود بارزانی پێشوازی لە خلووسی ئاكار وەزیری بەرگری توركیا و شاندێكی یاوەری كرد كە پێكهاتبوو لە یاشار گولەر سەرۆك ئەركانی سوپای توركیا و هاكان كاراچای كونسووڵی گشتیی توركیا لە هەولێر و ژمارەیەك ڕاوێژكار و كاربەدەستی وەزارەتی بەرگری توركیا.

لە دیدارەكەدا وەزیری بەرگری توركیا ئامانجی سەردانەكەی بۆ بەغدا و هەولێر خستەڕوو و، جەختی لەوە كردەوە كە سەقامگیری و ئاساییشی ناوچەكە و، هەروەها پێشەوەچوونی پەیوەندییەكانی نێوان توركیا و هەرێمی كوردستان و عێراق بۆ ووڵاتەكەی بایەخێكی زۆری هەیە و ڕاشیگەیاند، سەقامگیری و ئاساییش دەبێتە هۆی بووژانەوەی ئابووری و پێشكەوتنی ناوچەكە. لەبارەی پەیوەندییەكانی نێوان هەرێم و بەغداش وەزیری بەرگری توركیا ڕاگەیاند كە ووڵاتەكەی خوازیارە هەموو كێشەكان لە ڕێگەی دیالۆگ و لە چوارچێوەی دەستووردا چارەسەر ببێت.

لای خۆیەوە سەرۆك بارزانی وێڕای ئاماژەدان بە پەیوەندییە مێژووییەكانی نێوان هەرێمی كوردستان و توركیا، جەختی لە بنەماكانی دۆستایەتی و دراوسێ بوون لەنێوان هەردوولا كردەوە. هەروەها تیشکی خستە سەر بارودۆخی سیاسی و تەحەدییات و پێشهاتەکانی عێراق و ناوچەکە.

ئەم بابەتە 11987 جار خوێندراوەتەوە