پەیامی کورد   ...   سەرۆك بارزانی پێشوازی لە یانەی وەرزشی دهۆك کرد

پێنجشەممە 17ی نیسانی 2025 لە سەلاحەددین سەرۆك مەسعوود بارزانی پێشوازی لە بەڕێوبەر و یاریزانان و ستافی یانەی وەرزشی دهۆك كرد.

لەو دیدارەدا كە د. عەلی تەتەر پارێزگاری دهۆكیش ئامادە بوو، سەرۆك بارزانی بە گەرمی بەخێرهاتنی یانەی وەرزشی دهۆكی كرد و پیرۆزبایی سەركەوتن و بەدەستهێنانی قارەمانییەتی جامی كەندئاوی لێ كردن و دەستخۆشی لە یاریزانان و ستاف و بەڕێوبەر و هەموو ئەوانە كرد كە ڕۆڵیان لەو سەركەوتنە مێژووییەدا هەبووە. سەرۆك بارزانی ئاماژەی بە ڕۆڵی وەرزش و وەرزشوانان لە ژیانی گەلان دا و ئەوەشی خستەڕوو ئێوە دەتوانن لە سیاسەت زیاتر و باشتر دۆزی گەلەكەتان بە جیهان بناسێنن. سەرۆك بارزانی پاڵپشتی خۆی بۆ یانەی وەرزشی دهۆك و سەرجەم وەرزشوانانی كوردستان دووپات كردەوە و هیوای سەركەوتن و بەردەوامی بۆ خواستن.

هەر لەو دیدارەدا شاندی میوان سوپاسی پاڵپشتی و خەمخۆری سەرۆك بارزانیان كرد و ڕایانگەیاند كە پاڵپشتیەكانی سەرۆك بارزانی ئیرادەی سەركەوتن و ورەی زۆری پێ بەخشیون و ئەو سەركەوتن و جامەی بە دەستیان هێناوە وەك دیاری پێشكەشی سەرۆك بارزانی دەكەن.