پەیامی کورد   ...   سەرۆکی حکوومەت پێشوازی لە باڵیۆز سام بڕاونباک کرد

چوارشەممە مەسروور بارزانی سەرۆکی حکوومەتی ھەرێمی کوردستان پێشوازی لە باڵیۆز سام بڕاونباک سیاسەتوانی ناسراو و سیناتۆر و حاکمی پێشووی ویلایەتی کانساسی ئەمریکی و شاندێکی یاوەری کرد کە بۆ بەشداری لە ڕۆژی نزای نیشتمانی سەردانی ھەرێمی کوردستانیان کردووە.

باڵیۆز بڕاونباک ستایشی دۆخی بەیەکەوەژیانی ئاشتییانەی نێوان پێکھاتە جیاوازەکان و ئازادیی ئایینی ھەرێمی کوردستانی کرد و ئەنجامدانی ڕێورەسمی ڕۆژی نزای نیشتمانی لە کوردستان بە دەستپێشخەرییەکی ناوازە و گرینگ ناوبرد.

سەرۆکی حکوومەت جەختی لەوە کردەوە کە ھەرێمی کوردستان ھەمیشە مەڵبەندی بەیەکەوەژیانی ئایین و پێکھاتەی جیاواز بووە و پابەندین بە پاراستن و گەشەپێدانی ئەم کولتوورە و ئاشتی و تەبایی نێوان گشت پێکھاتەکان.