پەیامی کورد   ...   سەرۆکی ھەرێمی کوردستان و باڵیۆزی ئیتاڵیا دۆخی کوردستان و عێراق تاوتوێ دەکەن

پێنجشەممە ٢٠٢٥/٤/٢٤ نێچیرڤان بارزانی، سەرۆکی ھەرێمی کوردستان، پێشوازی لە نیکۆلۆ فۆنتانا، باڵیۆزی ئیتاڵیا لە عێراق کرد.

لە دیدارێکدا پەیوەندییەکانی ئیتاڵیا لەگەڵ عێراق و ھەرێمی کوردستان و برەودان بە ھاوکاری ھاوبەش لە بوارەکانی ئابووری، کولتوور، پەروەردە و پاراستنی کەلەپووردا، تاوتوێ کران و جەختیان لە بەردەوامی ھەماھەنگی لە بوارە جیاجیاکاندا کردەوە.

سەرۆکی ھەرێمی کوردستان ستایش و پێزانینی ھەرێمی کوردستانی بۆ ڕۆڵی ئەرێنی ئیتاڵیا لە چوارچێوەی ھاوپەیمانی نێودەوڵەتی دژی داعش و پشتگیری بەردەوامی بۆ پێشمەرگە و پرۆگرامەکانی گەشەپێدان دەربڕی، ھەروەھا جەختی لەسەر گرینگی بەھێزکردنی ھاوکاری و ھاوبەشی لەگەڵ ئیتاڵیا لە کەرتە جیاوازەکاندا کردەوە.

لای خۆیەوە، باڵیۆزی ئیتاڵیا ڕایگەیاند کە ووڵاتەکەی بە بایەخەوە لە پەیوەندییەکانی لەگەڵ ھەرێمی کوردستان دەڕوانێت، ھەروەھا ستایشی سەقامگیری و پێشکەوتنی لە ھەرێمی کوردستان کرد و خواستی ئیتاڵیای بۆ فراوانکردنی ھاوکاری ھاوبەش لە ھەموو بوارەکاندا لەگەڵ عێراق و ھەرێمی کوردستان، دووپات کردەوە.

دۆخی ناوچەکە و دوایین پێشھاتەکانی ڕۆژھەڵاتی ناوەڕاست، تەوەرێکی دیکەی دیدارەکە بوو.