پەیامی کورد      ...    سەعدی پیرە لە دیدار لەگەڵ کونسووڵی گشتی ئاڵمانیا باس لە گرینگی چارەسەری کێشە ئابووری و سیاسییەکانی عێراق دەکات

كونسووڵی گشتی ئاڵمانیا لە هەرێمی کوردستان لەگەڵ سەعدی پیرە کۆبوەوە و رایگەیاند، حکوومەتەکەی جەخت لەسەر سەقامگیری سیاسی و ئابووری و سەربازی لە هەموو عێراق دەکاتەوە، هاوکات خوازیاری ئاشتی و بەرقەراربوونی یاساو دابینکردنی خزمەتگواری جۆرا و جۆرە بۆ گەلانی عیراق لەگەڵ ئەوەشدا پشتیوانی لە سەرخستنی پرۆسەی سیاسی لە عیراق بەگشتی دەکەن.
بەپێی راگەێندراوێک، ئەمڕۆ پێنچشەممە سەعدی ئەحمەد پیرە، ئەندامی مەکتەبی سیاسی یەکێتی نیشتیمانی کوردستان لە نووسینگەی تایبەتی خۆی لە شاری هەولێر پێشوازیکرد لە كلێمێنس سێمتنەر، كونسووڵی گشتی ئاڵمانیا و لەبارەی چەند تەوەرێک گفتوگۆیان کردوە.
لەراگەێندراوەکەدا هاتوە، سەعدی پیرە ئاماژەی بە رۆڵ و گرینگی پێگەی ئاڵمانیای فیدراڵ کرد لە هاوکێشە نێودەوڵەتییەکان و رۆژهەڵاتی ناوەڕاست بەتایبەتی ئاماژەشی بە ئەو پشتگیری و هەماهەنگی کۆمەک و هاوکارییانەکرد کە حکوومەتی ئاڵمانیای فیدراڵ لەماوەی رابردوودا لە رووی سیاسی و سەربازی و مرۆییەوە پێشکەشی گەلی کورد و هەرێمی کوردستانی کردوە، گرینگترینیان بەشداری بەرچاوی ئاڵمانیا لە چوارچێوەی هاوپەیمانی نێودەوڵەتی دژ بە رێکخراوی تیرۆرستی داعش، ئەمە مایەی سوپاسگوزاری و رێزلێنانە لەلایەن گەلانی عێراق بەگشتی و گەلی کورد بەتایبەتی بۆ حکوومەت و گەلی ئاڵمانیا .

ئەوەش خراوەتەڕو، هەر لەو دیدارەدا باسی دۆخی عێراق و هەرێمی کوردستان و ناوچەکە کرا، بەتایبەتی بارودۆخی سیاسی عێراق و ئامادەکارییەکان بۆ هەڵبژاردنی پێشوەختەی پەرلەمانی عێراق کە بڕیارە لە مانگی ئۆکتۆبەری ئەمساڵ بەرێوەبچێت.

سەعدی ئەحمەد پیرە ئاماژەی بە گرینگی چارەسەری کێشە سیاسی و ئابوورییەکان لە عێراق کردەوە وەک بەشێک لە هێنانە دی خواست و داواکارییەکانی خۆپیشاندەرانی ناوچە جیاجیاکانی عێراق، هەڵبژرادنی پێشوەختەش یەکێک بو لەو داواکارییانە، هیواشی خواست ببێتە مایەی هێنانە کایەی کەشیکی لەباری سیاسی و ئابووری و پڕ خزمەتگوزاری بۆ گەلانی عیراق.

روونیشیکردەوە، هەماهەنگی و هاوکاری و پشتیوانی لۆجیستی ووڵاتانی خاوەن ئەزموون لە نێویشیاندا ئاڵمانیای فیدڕاڵ بۆ سەرخستنی پرۆسەکە بەشێوەیەکی شەفاف و سەرکەوتووانە پێویستیەکی گرینگە بۆ دەستکەوتنی دەرئەنجامێکی پاک.
كلێمێنس سێمتنەر، كونسووڵی گشتی ئاڵمانیا رایگەیاند، حکوومەتەکەی جەخت لەسەر سەقامگیری سیاسی و ئابوری و سەربازی لە هەموو عیراق دەکاتەوە، هاوکات خوازیاری ئاشتی و بەرقەراربوونی یاساو دابینکردنی خزمەتگواری جۆرا و جۆرە بۆ گەلانی عیراق لەگەڵ ئەوەشدا پشتیوانی لە سەرخستنی پرۆسەی سیاسی لە عیراق بەگشتی دەکەن.

ئەم بابەتە 11988 جار خوێندراوەتەوە