پەیامی کورد   ...   فاکس نیووز : بە فڕۆکەی بی ٢ دامەزراوە ژێرزەوییەکانی ئێران دەکرێنە ئامانج 

کاناڵی فاکس نیووز بە ئاماژەدان بە بەرەوپێش چوونی بەرنامەی ئەتۆمی کۆماری ئیسلامی نووسیویەتی هێرشکردنە سەر بەرنامەی ئەتۆمی ئێران چیتر خەیاڵ نییە و لە ئەگەری هێرشێکدا ئیسرائیل بە ناوگانی فڕۆکەهەڵگری خۆی ئاسمانی ئێران دەکاتەوە و فڕۆکەکانی بی ٢ی ئەمریکاش دامەزراوە ژێرزەمینییەکان دەکەنە ئامانج.

فاکس نیووز نووسیویەتی: ''لە هێرشەکانی ئۆکتۆبەری ٢٠٢٤دا ئیسرائیل زیاتر لە ١٠٠ فڕۆکەی شەڕکەری ڕەوانەی نزیکەی ٢٠ بنکە لە ئێران لەوانە سیستەمی بەرگری ئاسمانی و کارخانەکانی مووشەک و درۆن کرد، لە هێرش بۆ داماڵینی چەکی ئەتۆمی ئێران دیسانەوە تیشک دەخرێتە سەر لەناوبردنی بەرگری ئاسمانی.''

ئەو کاناڵە بڵاوی کردووەتەوە ناوگانە فڕۆکەهەڵگرەکانی هێزی دەریایی ئەمریکا لەوانە ''هێری ئێس، ترومەن و کارل وینسۆن'' لە ئێستادا لە ناوچەی کەندئاون، ئەوان ئۆپراسیۆنەکان دژی حووسییەکان لە یەمەن ئەنجام دەدەن، بەڵام دڵنیا بن کە دەتوانن لە هەر ساتێکدا تیشک بخەنە سەر ئێران.