بەگویرەی زانیاری و هەواڵەکان نەورۆز ئەحمەد، فەرماندەی گشتی یەکینەکانی پاراستنی ژنان (YPJ) باس لەوە دەکات پاش هێرشی سەربازی تورکیا بۆ سەر ناوچە کوردنشینەکانی سووریا لە ساڵی ٢٠١٩ دا ژمارەی ژنان لە ڕیزەکانیاندا زیادی کردووە.

نەوروۆز ئەحمەد بە ڕۆژنامەی گاردیەن-ی ڕاگەیاندووە تەنها دوو ساڵ پاش هێرشی تورکیا لە ساڵی ٢٠١٩ دا ١٠٠٠ شەڕڤانی ژن تێکەڵ بە هێزەکانیان بوونە. ئەوەش لە حاڵێکدایە کە کچانی ژێر تەمەن١٨ ساڵ و ژنانێک کە مێردیان هەیە مووڵەتی تێکەڵ بوونیان بەم هێزانەوە پێنەدراوە.

ناوبراو دەڵێت هۆکاری زیاتر بوونی ژنانی شەڕڤانی کوردی سووریا و مانەوەی هێزەکانی یەپەژە بۆ ڕووبەڕووبوونەوەی تورکیایە لە ناوچە کوردنشینەکانی سووریا و هەوڵدان بۆ دەرکردنی هێزەکانی ئەو ووڵاتە لە عەفرین و گرێ سپی.

نەورۆز ئەحمەد دەڵێت لە ئێستادا ژمارەی هێزەکانیان دەگاتە ٥٠٠٠ کەس. جەختیشی کردەوە ژمارەی ئەو هێزانە لە گەرمەی شەڕی داعشدا لە ساڵی ٢٠١٤ هەمان ژمارە بووە و وەبیری هێنایەوە کە سەدان کەس لەو هێزانە لە شەڕی داعشدا گیانیان لەدەست دا.

ناوبراو ووتیشی نزیکەی ٤٠لە سەدی هێزەکانی پۆلیس لە حەسەکە لە ئەندامانی YPJ پێکهاتوون و لە دوو ساڵی ڕابردوودا ١٠٠٠ کەس بۆ شەڕی تورکیا تێکەڵ بە هێزەکانیان بوونە.