"ئانە کلێر لگندرێ" ووتەبێژی وەزارەتی دەرەوەی فەڕەنسا سەبارەت بە ڕاپۆرتی پێشووی ئاژانسی ئەتۆمی ڕێژیمی ئێران بە تووندی نیگەرانی دەربڕیوە و داوای لە شەورای بڕیاردانی ئاژانسی نێونەتەوەیی کردووە کە پەیامێکی تووند لەو پەیوەندییەدا بۆ ڕێژیمی ئێران بنێرێت.

هەروەها ئەو شەورایە بڕیارە حەوتووی داهاتوو بۆ ئەو مەبەستە دانیشتنێک پێک بهێنێ.

"لگندرێ" وتوویەتی: "ڕێژیمی ئێران دەبێ بەبێ کات بەفێڕۆدان بەڵێن و ئەرکەکانی سەبارەت بە ئاژانسی نێونەتەوەیی جێبەجێ بکات، هەروەها هاوکاری لەگەڵ ئاژانس دەست پێبکاتەوە و لە چوارچێوەی بەرجامدا بە بەڵێنییەکانی وەفادار بێت".

"سەعید خەتیب زادە" ووتەبێژی وەزارەتی دەرەوەی ڕێژیمی ئێران لە دژکردەوەی بەو قسانەی ووتەبێژی وەزارەتی دەرەوەی فەڕەنسا وتوویەتی: "ئێران وەکوو ئەندامێکی بەرپرسی ئاژانسی نێونەتەوەیی ووزەی ئەتۆمی، بەردەوام جەختی کردووەتەوە کە ئابڕووی ئاژانس وەکوو ناوەندێکی تەکنۆلۆژی و شارەزای ڕێکخراوی نەتەوە یەکگرتووەکان دەبێ لە هەرشێوە هەڵسوکەوت و کردەوەیەکی سیاسی بەدوور بێت".

ئاژانسی نێونەتەوەیی ڕۆژی چوارشەممە ڕایگەیاندبوو کە پاشەکەوتکردنی یۆرانیۆمی پیتێندراوی ڕێژیمی ئێران بەرز بووەتەوە و "تاران" بەو کارەی بەڵێنییەکانی لە چوارچێوەی بەرجامدا پێشێل کردووە.