پەیامی کورد      ...   فەیسبووک لاپەڕەیەکی فەرمى سەر بە ئێران داخست
لاپەڕەى سەرەکى فەیسبووکی ، کەناڵى جیهانى "الکوثر"ى ئێران بە ناوونیشانى (Alkawtharchannel) بە تەواوى داخرا و لە پلاتفۆڕمى سەرەکی فەیسبووک سڕدرایەوە.

بە پێى ڕاپۆرتێک ، سەرۆکى پەیوەندی و هاوکارییە نێونەتەوەییەکانى کەناڵى کەوسەر، سەرەڕاى پشتڕاستکردنەوەى سڕینەوەى کەناڵەکە لە تۆڕی کۆمەڵایەتى فەیسبووک، ئاماژەشى بەو هۆشداریانە کرد کە لە لایەن ئینستاگرام و فەیسبووکەوە بۆى هاتوون.

حەفتەی ڕابردوو، فەیسبووک لە ڕاپۆرتێکدا ڕایگەیاند ٢٠٠ هەژمارى ساختەى وەستاندووە کە بۆ سیخووڕى و بڵاوکردنەوەى درۆ بەکار دەبران. لە کاتى لێکۆڵینەوەکاندا، فەیسبووک بەو دەرەنجامە گەیشتووە کە خراپ بەکارهێنانى ئەم گرووپە هاکەرە، لە لایەن کۆمپانیاى "مەحەک ڕایان ئەفزار"ى سەر بە سوپاى پاسداران پشتیوانى کراوە.

دواى بڵاوبوونەوەى ئەم ڕاپۆرتە، کەناڵى لینک دینى ژێر کۆمەڵەى مایکرۆسۆفتی، ژمارەیەک هەژمارى سڕیوەتەوە و هەروەها تویتەریش ڕایەگەیاندووە کە چالاکانە خەریکى لێکۆڵینەوەیە لەمەڕ زانیارییەکانى نێو ڕاپۆرتەکەى فەیسبووک.

ئەم بابەتە 11989 جار خوێندراوەتەوە