قوباد تاڵەبانی نیگەرانی خۆی سەبارەت بە بابەتێکی گرینگ دەربڕی
پەیامی کورد ... قوباد تاڵەبانی نیگەرانی خۆی سەبارەت بە بابەتێکی گرینگ دەربڕی
قوباد تاڵەبانی رایده‌گه‌یه‌نێت، نیگەرانم له‌وه‌ى کە سەرباری ئەوەی هەرێمی کوردستان هەموو پابەندییەکی بە یاسای بوودجەی فیدراڵی جێبەجێ کردووە، بەڵام هێشتا حکوومەتی بەغدا شایستە داراییەکانی هەرێمی خەرج نەکردووە، داواشى كرد حکوومەتی فیدرال پابەندییەکانی خۆی جێبەجێ بکات.
قوباد تاڵەبانی، جێگری سەرۆک وەزیرانى هه‌رێمى كوردستان پێشوازیکرد لە ئیلبروس کوتراشیڤ باڵیۆزی نوێی رووسیا لە عێراق و شاندی یاوەری و ، پێکەوە تاوتوێی پەرەپێدانی پەیوەندییە ئابوورییەکانی نێوان هەرێمی کوردستان و رووسیایان کرد.
لە کۆبوونەوەکەدا جێگری سەرۆک وەزیران داوایکرد لە باڵیۆزی رووسیا هانی زیاتری کۆمپانیا رووسییەکان بدات بۆ وەبەرهێنەران لە هەرێمی کوردستان.
لە بەشێکیتری کۆبوونەوەکەدا قوباد تاڵەبانی ئاماژەی بەوەدا، کە پەیوەندییەکانی نێوان کوردستان و رووسیا پەیوەندییەکی مێژووییە و ئامانجی هەرێمی کوردستان ئەوەیە کە بەهێزتر و پتەوتر بکرێن.
هاوكات قوباد تاڵەبانی نیگەرانی دەربڕی کە سەرباری ئەوەی هەرێمی کوردستان هەموو پابەندییەکی بە یاسای بوودجەی فیدراڵی جێبەجێ کردووە، بەڵام هێشتا حکوومەتی بەغدا شایستە داراییەکانی هەرێمی خەرج نەکردووە.
جێگری سەرۆک وەزیران وتيشى، پێویسته حکوومەتی فیدرال پابەندییەکانی خۆی جێبەجێ بکات بۆ ئەوەی هەردوولا بتوانن بە شێوەیەکی بۆنیادنەرانە درێژە بە دانووستانەکانیان بدەن بۆ چارەسەرکردنی هەموو کێشە هەڵپەسێردراوەکانی تر.
لە کۆبوونەوەکەدا ئیلبروس کوتراشیڤ باڵیۆزی نوێی رووسیا ئامادەیی خۆی و ووڵاتەکەی دەربڕی بۆ هاوکاری کردنی هەردوو حکوومەتی فیدراڵ و حکوومەتی هەریم و ئاماژەی بەوەشدا کە هانی کۆمپانیا رووسییەکان دەدات کە بۆ وەبەرهێنان بێنە هەرێمی کوردستان.
ئەم بابەتە 11991 جار خوێندراوەتەوە