پەیامی کورد     ...   قوباد تاڵەبانی کاردانەوەی خۆی سەبارەت بە هێرشەکانی سەر فڕۆکەخانەی هەولێر ئاشکرا دەکات

قوباد تاڵەبانی جێگری سەرۆكی حکوومەتی هەرێمی كوردستان رایگەیاند، بە ئامانجگرتنی فڕۆكەخانەی نێودەوڵەتی هەولێرو نێردە دیپلۆماسییەكان "كارێكی تیرۆرستییەو خزمەت بە ئەجێنداو بەرژەوەندی تەسكی ئەو لایەنانە دەكات كە لەپشت هێرشەكانەوەن"، بۆیە باوەڕیانوایە هێرشەكان پێشێلكردنی سەروەری عێراقن.

قوباد تاڵەبانی بە رۆژنامەی (الشرق الاوسط)ـی ڕاگەیاندووە "پێویستە هەوڵەكان لەنێوان دەزگا ئەمنییەكانی بەغداو هەرێم یەك بخرێن بۆ راگرتنی ئەو دەستدرێژییانە كە پێشێلكردنی سەروەری عێراقە، چوونکە ئەو لایەنانەی لە پشت ئەم دەستدرێژیانەوەن مەترسی و ئاكامی ئەم جۆرە هێرشانە نازانن‌. ئەوان جگە لە بەرژەوەندی‌و ئەژێندای خۆیان هیچ شتێكی دیکە نابینن".

ئاماژەی بەوەشکردوە، بەردەوامبوونی هێرش و پێشێلکارییەکان مەترسیدارە و دەبێتەهۆی درووستبوونی ئاژاوە و بێبەهاکردنی سەروەری دەوڵەتی عێراق، ئەوەش کاریگەری خراپی دەبێت لەسەر بەرژەوەندییەکانی عێراق و پەیوەندییەکانی لەگەڵ کۆمەڵگەی نێودەوڵەتی.

پەیوەست بەم بابەتەش نیوەڕۆی ئەمڕۆ مارتن هوت باڵیۆزی یەکێتی ئەورووپا لەعێراق له‌تویتەر پەیامێکی بڵاوکردەوە و ئاماژەی بەوەکرد، ئەو هێرشانەی بەدرێژایی هەفتەی رابردو کرانەسەر بنکە سەربازییەکانی هاوپەیمانان، فڕۆکەخانە، باڵیۆزخانە و کونسووڵخانەی ووڵاتان هەڕەشە و ئاڵنگارییە بۆسەر دەوڵەتی عێراق.

ئاماژەی بەوەشکرد، ئامانجی هێرشەکان درووستکردنی گرژی و نائارامی سیاسییە لەکاتێکدا عێراق بەرەو هەڵبژاردنێکی پێشوەختی پەرلەمان هەنگاو دەنێت.
لەماوەی سێ رۆژی رابردوودا و چەندجارێک هێرشی مووشەکی کراوەتەسەر بنکە سەربازییەکانی هاوپەیمانان، فڕۆکەخانە، باڵیۆزخانە و کونسووڵخانەی ووڵاتان لەبەغدا، هەولێر، ئەنبار و چەند ناوچەیەکی دیکە عێراق، تائێستاش حکوومەت لەبارەی ئەو لایەنانەی هێرشەکەیان ئەنجامداوە و دەستگیرکردنی تۆمەتباران روونکردنەوەی نەداوە.

ئەم بابەتە 11990 جار خوێندراوەتەوە