پەیامی کورد   ...   لانیکەم ١٥ هاووڵاتی بەلووچ بە شێوەیەکی تووندوتیژانە لەلایەن هێزە چەکدارەکانی ئێران ەوە دەست بەسەرکران

بەپێی ڕاپۆرتی حاڵ وەش لانیکەم ١٥ هاووڵاتی بەلووچ کە ناسنامەیان نییە و چواریان ژنن، لە ناوچەی لادیز لە شاری میرجاوە، بە شێوەی تووندوتیژانە بە بیانووی ئەوەی کە هاووڵاتی ئەفغانستانین، لەلایەن هێزەکانی ڕێژیمەوە دەست بەسەر کراون و بۆ شوێنێکی نادیار گواستراونەتەوە.

حاڵ وەش ڕایگەیاندووە کە : لانیکەم پێنج ئۆتۆمبێل لە هێزەکانی ڕێژیم، نزیک کاتژمێر ١٢ی نیوەڕۆ چوونەتە ناو چەند گوندێکی ناحیەی لادیز و بە بێ ئەوەی ڕوونکردنەوەیەک بدەن، لانیکەم ١٥ کەسیان  بە تۆمەتی نەبوونی ناسنامە و بیانی بوون دەسبەسەر کردووە.

زۆربەی ئەوانەی دەسبەسەر کراون خەڵکی ڕەسەن و بە ڕەچەڵەک خەڵکی هەمان گوندن و ساڵانێکە لە هەمان ناوچەدا دەژین، و مامەڵەی هێزەکانی ڕێژیم لەگەڵیان نیگەرانییەکی بەرفراوانی لای خەڵکی ناوچەکە درووست کردووە.

حاڵ وەش ڕایگەیاندووە کە هیچ زانیارییەک لەبارەی شوێنی ڕاگرتن و دۆخیان دوای دەسبەسەرکردنیان لەبەر دەستدا نییە و ناوەندە پێوەندیدارەکان هیچ ووڵامێکیان نادەنەوە.