ئەندامێكی هاوپەیمانی دەوڵەتی یاسا ڕایدەگەیاند : هەندێك لایەنی ناوخۆیی و دەرەكی كار لەسەر هەڵوەشاندنەوەی حەشدی شەعبی دەكەن.

كاتی ڕەكابی ئەندامی هاوپەیمانی دەوڵەتی یاسا لە پەڕلەمانی عێراق بە سۆمەریە نیوزی ڕاگەیاند، هەندێك لایەنی ناوخۆیی و هەرێمی بەدوای هەڵوەشاندنەوەی گرووپەكانی حەشدی شەعبین و ئاگاداری سەرجەم جمووجووڵەكانیشین.

ئەو هەروەها ئاشكرای دەکات، ١٩٧ بەرپرسی كۆمیسیاری باڵای هەڵبژاردنەكان لەلایەن ئەمریكاوە لە بنكەی عەین ئەسەدەوە میوانداری كراون و دوو شەو لەوێ ماون ، ئەمەش بووەتە هۆی دەستكاریكردنی ئەنجامی هەڵبژاردنەكان.

ڕوونیشیكردەوە، فڕۆكەیەكی تایبەت فەرمانبەرانی كۆمیسیۆنی باڵای هەڵبژاردنەكانی بۆ بنكەی عەین ئەسەد گواستووەتەوە، ئەمەش لەكاتێكدایە، سەرجەم گرووپەكانی حەشدی شەعبی دەستیان بەخۆپیشاندان و ناڕەزایەتی كردووەو لە ئەنجامی هەڵبژاردنەكان ناڕازین.