پەیامی کورد     ...   لیوا عەبدۆلخاڵق : تەنیا ئەمریکا دەتوانێت کێشەی ھێرشی سەر بنکەکانی لە ھەرێم و عێراق چارەسەر بکات

وەزارەتی دەرەوەی ئەمریکا بڕیاری داوە ھەزار و٨٠٠ سەربازی شەڕکەری ووڵاتەکەی ڕەوانەی عێراق و ھەرێمی کوردستان بکات بۆ پارێزگاریکردن لە بنکەکانی، نوێنەری ھەردوو وەزارەتی پێشمەرگە و ناوخۆ لە فەرماندەیی ئۆپراسیۆنی ھاوبەشی عێراقیش دەڵێت، ھاتنی ئەو ھێزە بۆ ھەرێم و عێراق زۆر پێویستە، چوونکە تەنھا ئەمریکا دەتوانێت ئەو کێشەیە چارەسەر بکات، ئەگەرنا خراپتر دەبێت و کێشەی گەورەتر پەیدا دەبێت.

لیوا عەبدۆلخالق تەڵعەت، ڕایگەیاند : "پێویستە بەزووترین کات ھێزی ھاوپەیمانان، بەتایبەت ئەمریکا ئەو کێشەیە چارەسەر بکەن و ڕووبەڕووی ئەو کێشانە ببنەوە کە ئەمڕۆ لە عێراق هەن، بەتایبەتی ئەو ھێرشانەی دەکرێنە سەر بنکەکانی ئەمریکا لە فڕۆکەخانەی ھەولێر و ئەوانەی دیکە، چوونکە لە ماوەی ھەفتەیەکدا ھێرش کرایە سەر باڵیۆزخانەی ئەمریکا و ھێرش کرایە سەر بنکەی عەین ئەسەد و بنکەی فڕۆکەخانەی ھەولێر، بۆیە تەنھا ھێزەکانی ھاوپەیمانان دەتوانن ڕووبەڕووی ببنەوە و ئەگەر چارەسەر نەکرێت ئاکامی خراپتری دەبێت.''

تەڵعەت باسی لەوەش کرد: "ھەبوونی ھێزی ئەمریکا لە عێراق گرینگ و پێویستە بۆ ئەوەی بتوانێت ئەو کێشەیە چارەسەر بکات."

ووتیشی: "ئەوانەی ئەو کارە دەکەن ئەو کۆمەڵە چەکدارانەن کە باڵادەستن لە عێراق، بۆیە ئەو کێشە و ھێرشانەی دەکرێنە سەر بنکەکانی ھاوپەیمانان، تەنھا ئەمریکا دەتوانێت ئەو کێشەیە چارەسەر بکات، بۆیە پێویستە سنوورێکیان بۆ دانێت، چرونکە ئەگەر بەردەوام بێت کێشەی گەورەتر ڕوو دەدات، بۆیە پێویستە ئەمریکا بە ھاوبەشی لەگەڵ حکوومەتی ھەرێم و عێراق ئەو کێشەیە چارەسەر بکات و ڕێگە نەدرێت ئەو گرووپە چەکدارانەی باڵادەستن بەئاسانی ھێرش وبکەن سەر بنکەکان، چ لەناو خاکی عێراق بێت، یان لە ھەرێمی کوردستان."

لیوا عەبدۆلخاڵق تەڵعەت ڕوونیشی کردەوە: ''ئەو ھێرشانەی دەکرێت پەیوەندیی بە بۆشایی ئەمنییەوە نییە و ئەمە درۆنە و فڕۆکەی بێفڕۆکەوانە و بە ئاسماندا دەچێت  و لە ھەر شوێنک بیانەوێت ھەڵیدەستێنن و بەکاری دێنن.''

ئەم بابەتە 11988 جار خوێندراوەتەوە