پەیامی کورد   ...   لێبووردنی نێونەتەوەیی : ئێران بەرپرسیاری ٦٤ لەسەدی لەسێدارەدانەکانی تۆمارکراو لە جیهان لە ساڵی ٢٠٢٤ـە

ڕێکخراوی لێبووردنی نێودەوڵەتی لە ڕاپۆرتی ساڵانەی خۆیدا لەژێر ناوی "حوکمی لەسێدارەدان و جێبەجێکرانی لە ساڵی ٢٠٢٤" ڕایگەیاند، ئەمساڵ ژمارەی لەسێدارەدانە تۆمارکراوەکان لە سەرانسەری جیهاندا گەیشتووەتە هەزار و ٥١٨ کەس کە لە دوای ساڵی ٢٠١٥ـەوە بەرزترین ژمارەیە، زیاتر لە ٩١ لەسەدی ئەو لەسێدارەدانانە تەنیا لە سێ ووڵاتی  ئێران و عێراق و عەرەبستان ئەنجام دراون.

بەپێی ئەم ڕاپۆرتە، هەرچەند ژمارەی ئەو ووڵاتانەی لە ساڵی ٢٠٢٤دا سزای لەسێدارەدانیان ئەنجام داوە تەنیا ١٥ ووڵات بووە، و ئەمە کەمترین ڕێژەیە کە تۆمار کراوە، بەڵام بەکارهێنانی سزای لەسێدارەدان بەتایبەتی لە ڕۆژهەڵاتی ناوەڕاستدا ڕەوتێکی نیگەرانکەر بووە.

چین، ئێران، سەعوودیە، عێراق و یەمەن لە لووتکەی ئەو ووڵاتانەدان کە زۆرترین لەسێدارەدانیان تۆمار کردووە.

لە ئێران لە ساڵی ٢٠٢٤دا ٩٧٢ کەس لە سێدارە دراون کە ٦٤ لەسەدی هەموو ئەو سێدارە تۆمارکراوانەی جیهان پێک دەهێنن.