لێژنەی دارایی پەرلەمانی عێراق چه‌ند ڕێگایه‌ك دیاریدەکات بۆ نه‌هێشتنی بێكاری و ئاسانكردنی بارگرانی بوودجه‌ی ساڵی ٢٠٢٢
پەیامی کورد ... لێژنەی دارایی پەرلەمانی عێراق چه‌ند ڕێگایه‌ك دیاریدەکات بۆ نه‌هێشتنی بێكاری و ئاسانكردنی بارگرانی بوودجه‌ی ساڵی ٢٠٢٢
لیژنه‌ی دارایی په‌رله‌مانی عێراق، ئه‌مڕۆ چوارشه‌ممه، چه‌ند ڕێگایه‌كی دیاریكرد بۆ نه‌هێشتنی بێكاری و ئاسانكردنی بارگرانی له‌سه‌ر بوودجه‌ی ٢٠٢٢ و داواشیكرد، پێداچوونه‌وه به مووچه‌ی فه‌رمانبه‌ران بكرێت.
ماجده ته‌میمی ئه‌ندامی لیژنه‌ی دارایی له په‌رله‌مانی عێراق، لیژنه‌كه‌یان پێشبینیده‌كات نرخی به‌رمیلێك نه‌وت له بوودجه‌ی ٢٠٢٢ دا به ٥٥ دۆلار هه‌ژمار بكرێت، له‌به‌رامبه‌ریشدا ده‌بێت حكوومه‌ت پشتگیری كه‌رتی تایبه‌ت بكات ئه‌گه‌ر بیه‌وێت بارگرانی له‌سه‌ر بوودجه‌كه كه‌م بكاته‌وه.
ووتیشی، "پاڵپشتیكردنی كه‌رتی تایبه‌ت ده‌بێته هۆی درووستكردنی هه‌لیكار بۆ گه‌نجان و ئه‌و ده‌رچوانه‌ی كه به‌رده‌وام له زیادبوون دایه كه بوه‌ته هۆكارێكی سه‌ره‌كی له به‌رزبوونه‌وه‌ی بێكاری".
له‌باره‌ی مووچه‌ی فه‌رمانبه‌ران یشه‌وه، ماجده ته‌میمی ئاشكرایكرد، پێویسته پێداچوونه‌وه به مووچه‌دا بكرێت، بۆئه‌وه‌ی بنه‌مایه‌كی لۆژیكی و دادپه‌روه‌رانه په‌یڕه‌و بكرێت و مووچه‌كان سه‌رجه‌میان رێك بخرێنه‌وه، هه‌روه‌ها بۆ چاره‌سه‌ركردنی كێشه‌ی هه‌ژماركردنی بڕوانامه‌كانیش، پێویسته پسپۆڕی و بنه‌مای كاری فه‌رمانبه‌ران ره‌چاو بكرێت.
پێشتریش ئه‌حمه‌د سه‌فار، بڕیارده‌ری لیژنه‌ی دارایی ئه‌نجوومه‌نی نوێنه‌رانی عێراق رایگه‌یاندبوو، ئاماده‌كردنی پرۆژه‌یاسای ساڵی ٢٠٢٢ ده‌وه‌ستێته سه‌ر بارودۆخی سیاسی و هه‌ڵبژاردنه‌كان، ئه‌گه‌ر هه‌ڵبژاردنی په‌رله‌مان له‌واده‌ی دیاریكراوی خۆی و له 10ی (تشرینی یه‌كه‌م/10)ی ئه‌مساڵ به‌ڕێوه‌بچێت، بژارده‌یه‌ك بۆ بوودجه‌ی ساڵی داهاتوو ئاماده ده‌كه‌ن تا ساڵی داهاتوو كێشه‌ی په‌سه‌ندكردنی بوودجه درووست نه‌بێت.
ئەم بابەتە 11987 جار خوێندراوەتەوە