بەڕێوبەری ڕاگەیاندنی قایمقامیەتی بەردەڕەش ووتی، لە سنووری قەزای بەردەڕەش بە گوژمەی نزیکەی ١٩ ملیار دینار پڕۆژەی ڕێگا و نەخۆشخانەیەکی فریاکەوتن لە بواری جێبەجێکردندان کە سوودێکی زۆری بۆ خەڵکی قەزای بەردەڕەش و دەورووبەری دەبێت.

بۆتان بۆتانی، بەڕێوبەری ڕاگەیاندنی قایمقامیەتی بەردەڕەش، ڕایگەیاند : ''ڕێگای قەرەناز بۆ کەورەسۆر کە ٤٦ کم دەبێت بە سێ قۆناغ تەواو دەکرێت و قۆناغی یەکەمی تەواو بووە و ئێستا قۆناغی دووەم کاری تێدا دەکرێت و تا بیۆک ڕۆیشتوون و تا ئەوێش قێرتاو کراوە و ٢٨ گوند لەو ڕێگایە سوودمەند دەبن کە لە قەرەناز تا کەورەسۆر دەست پێ دەکات و ڕۆژانە ٢٤ کاتژمێر کاری تێدا دەکرێت و ٣٥٠ کارمەندیش کاری تێدا دەکەن، ئەو گوژمەی بۆیشی تەرخان کراوە ١٤ ملیار دینارە.''

بۆتان بۆتانی ووتیشی: ''جگە لەوە، نەخۆشخانەیەکی فریاکەوتنیش لە جێبەجێکردندایە بە گوژمەی ملیارێک و ٤٥٠ ملیۆن دینار و ئێستا ٢٤%ی تەواو بووە و بەردەوامیش کاری تێدا دەکرێت و بڕیارە لە ماوەی ١٠ مانگدا ئەو نەخۆشخانەیە تەواو بێت، چوونکە بەردەڕەش تا ئێستا نەخۆشخانەی نییە و ئەو نەخۆشخانەیە بۆ بەردەڕەش زۆر پێویستە.''