پەیامی کورد    ...    لە پەیامێکدا مەلا بەختیار ڕەخنەی تووند لە دەسەڵاتی یەکیتی دەگرێت 

مەلا بەختیار ئاماژە بەوە دەکات کە لە دەربەندی گۆمەسپان_ کۆیەوە، هەتا گەرمیان ڕێگاكان یەك ساید و پڕ لە چاڵ و پێچی مەرگن، لەكاتێكدا ژمارەی گومرگەکانی سلێمانی لە هەولێر_ دهۆك زیاترن. نەوت و گاز لە ئیدارەی جارانی سلێمانیدا بایی هەموو پرۆژەکانی تیادایە.

لە نووسینێكدا كە لە لاپەڕەی تایبەتی خۆی بڵاویكردووەتەوە، مەلا بەختیار، ئەندامی ئەنجوومەنی باڵای سیاسی و بەرژەوەندی یەكێتی نووسیویەتی: دوێنێ، پێنج یاریکەری بالە لەنێوان هەولێر ـ کۆیە بە ڕووداوی سەیارە، بوونە قوربانی و پەژارەیەکی قووڵیان خستە ناو وەرزشکاران و کوردستان، هاوبەشی خەمی هاوڕێ و کەس و کاریانم. بەهیواشم حکوومەت لەم رووداوانە پەند وەربگرێ و هەندێك رێگاو بان، بە ڕێگای مەرگ ناسراوون، بیانکاتە دووساید.

دەشڵێت: کوردستان، وەکوو دوو دەڤەری جیاوازیان لێهاتووە، لە هەولێرەوە هەتا دهۆك رێگاکان چاك و دوو سایدن، لە دەربەندی گۆمەسپان ـ کۆیەوە، هەتا گەرمیان، سەدان ((کم)) یەك ساید و پڕ لە چاڵ و پێچی مەرگن.

ڕەخنەی تووند لە ئیدارەی سلێمانی دەگرێت و دەڵێت: ژمارەی گومرگەکانی سلێمانی لە هەولێر ـ دهۆك زیاترن. نەوت و گاز لە ئیدارەی جارانی سلێمانیدا بایی هەموو پرۆژەکانی تیادایە، بازرگانی فراوان لەم دەڤەرەدا هەیە، کەچی پرۆژەکان زۆربەیان ڕاگیراون و مووچە دابین ناکرێ و خانەنشینی داماویش.. لە برسان و لە ژێر پاڵە پەستۆدا رۆژانە گیانیان دەبەخشنە بێباکی ئیدارەی سلێمانی. ئەم پێنج وەرزشکارەی بالەش قوربانی سیاسەتی نەبوونی ستراتیژی ژێرخانی ڕێگاوبانن.