پەیامی کورد     ...   لە ھەرێمی کوردستان تا ئەم ئاست و ڕێژەیە هاووڵاتیان ڤاکسین یان وەرگرتووە

ڕاوێژکاری وەزارەتی تەندرووستیی حکوومەتی ھەرێمی کوردستان ووتی، ئەوانەی دانرابوون ڤاکسین وەربگرن ڕێژەکەیان گەیشتووەتە ٩% و تاوەکوو ئێستاش نزیکەی ٤٣٠ ھەزار کەس ڤاکسینی وەرگرتووە و خەڵکێکی زۆریش ڕوو لە بنکەکان دەکەن بۆ ئەوەی ڤاکسین وەربگرن .

دکتۆر ئارام ڕۆستەم، ڕاوێژکاری وەزارەتی تەندرووستی حکوومەتی ھەرێمی کوردستان، ڕایگەیاند : "بە شێوەیەکی گشتی ئەوانەی بەتەمەنن، یاخود نەخۆشی درێژخایەنیان ھەیە، یاخود کارمەندی تەندرووستین و دکتۆرەکان و ھێزەکانی ناوخۆ ٩%یان ڤاکسینیان وەرگرتووە و پرۆسەکەش بەردەوامە بۆ ئەوەی زۆرترین کەس ڤاکسین وەربگرێت.''

دکتۆر ئارام ڕۆستەم ووتیشی: "تاوەکوو ئێستا لە ھەرێمی کوردستان نزیکەی ٤٣٠ ھەزار کەس ڤاکسینیان وەرگرتووە و ئێستا خەڵکێکی زۆر ڕوو لە بنکەکانی تەندرووستی دەکەن بۆ ئەوەی ڤاکسین وەربگرن، چوونکە پێشتر بە ھەڕەمەکی بوو، ئێستا پێویستە ناویان تۆمار بکەن کە گەڕاوە ئەوکات بێن ڤاکسین وەربگرن.''

رۆستەم باسی لەوەش کرد: "ڤاکسینەکان چەند جۆرێکیان ھەیە و ھیچ جیاوازی لە نێوان ڤاکسینەکان نییە و ئەوەش ڕاست نییە کە باس لەوە دەکرێت ئەو ڤاکسینە بۆ کۆرۆنای جۆری نوێ کاریگەر نییە، بەڵام کۆرۆنای نوێ زۆر بەخێرایی بڵاو دەبێتەوە و ئەگەر پێشتر ١٠ کەس تووش بووایە ئێستا ١٧ کەس تووش دەبێت لە ڕووی خێرایی بڵاوبوونەوە و نیشانەکانیشی جیاوازن کە کۆکە و ھەڵامەت و زکچوونیان ھەیە."

ووتیشی: "تا ئێستا ڤاکسین لە ڕێگەی بەغداوە بۆمان دێت و بەردەوامیش ڤاکسین دێت و تا ئێستا کێشەمان بۆ درووست نەبووە.''

ڕاوێژکاری وەزارەتی تەندرووستی حکوومەتی ھەرێمی کوردستان ڕوونیشی کردەوە: "پێویستە خەڵک خۆی بپارێزێت، چونکە نەخۆشییەکە زۆر بڵاو بووەتەوە، بۆیە باشترین شت خۆپارێزی و پابەندبوون بە ڕێنمایییەکانە.''

ئەم بابەتە 11990 جار خوێندراوەتەوە