مەحموود عوسمان : قاسم سلێمانی پیاوێکی سیاسی بوو، زیره‌ک بوو تۆزێک له بارودۆخی هه‌رێم تێده‌گه‌یشت ، دەبێ هەرێمی کوردستان داوای كشانه‌وه‌ی هێزه‌كانی ئه‌مریكا بكات
پەیامی کورد ... مەحموود عوسمان : قاسم سلێمانی پیاوێکی سیاسی بوو، زیره‌ک بوو تۆزێک له بارودۆخی هه‌رێم تێده‌گه‌یشت ، دەبێ هەرێمی کوردستان داوای كشانه‌وه‌ی هێزه‌كانی ئه‌مریكا بكات
د.مەحموود عوسمان سیاسەتمەداری دیاری کورد رایگەیاند، ده‌بێت هه‌رێم داوای کشانه‌وه‌ی هێزه‌کانی ئه‌مریکا بکات له فڕۆکه‌خانه‌ی نێوده‌وڵه‌تی هه‌ولێر چوونکه هه‌ستیاره، بچنه شوێنێکی تر و دووربکه‌ونه‌وه له‌وێ، "بۆ فڕۆکه‌خانه‌که‌مان له‌مه‌ترسیدا بێت، ئه‌وه دو سێ جار لێیان ده‌ده‌ن ئیتر ئێمه بۆ ببینه قوربانی، با دووربکه‌نه‌وه و بچێت له‌شوێنێکی دیکه بابچن لێیده‌ن که‌یفی خۆیانە، به‌ڵام نابێت ئێمه ئه‌و باجه بده‌ین".
د.مەحموود عوسمان دەربارەی هێرشەکان بۆ سەر بنکەکانی هێزەکانی ئەمریکا و هاوپەیمانان لە عێراق و هەرێمی کوردستان بە دەنگی ئەمریکای راگەیاندوە، "به‌لای منه‌وه ئه‌م هێرشانه دیارن، ئاشکران ئه‌وانه‌ی که ده‌یکه‌ن خۆیان ده‌ڵێن ئێمه‌ین وه‌کوو عه‌سائیب و که‌تائیب و سیدالشهدا ، ئه‌مانه هه‌موی سه‌ر به ئێرانن، ئه‌گه‌رچی ئێران ده‌ڵێت من په‌یوه‌ندیم نییه بێگومان ڕاست ناکات، ئه‌مه بۆ ئه‌وه‌یه که ئه‌مریکا ده‌ربکه‌ن له‌عێراق ئه‌وه سیاسه‌تی ئێرانه و ئه‌وانیش جێبه‌جێی ده‌که‌ن، ئه‌مریکا به‌رامبه‌ر به‌مه به‌ڕاستی نازانم به‌ته‌مای چیه، ئه‌مریکا هه‌وڵده‌دات له‌گه‌ڵ ئێران ڕێکبکه‌وێت، ڕێککه‌وتنیان هێشتا دروست نه‌بوه له‌به‌رئه‌وه نازانیین تا چ ئاستێک ڕێککه‌وتن ده‌بێت یان نابێت؟، ئایا ئه‌م کاته که ئه‌م هێرشانه ده‌که‌نه سه‌ری به‌رگری له‌خۆی ده‌کات به‌رگری له خه‌ڵکی تر ده‌کات؟ ئه‌وه‌شیان زۆر ڕون نییه چوونکه له‌وه‌ناچێت به‌ته‌مای به‌گری کردن بن لێیان".
لەبارەی ئەوەی ئایا هێزەکانی ئەمریکا دەمێننەوە، مەحمود عوسمان دەڵێت، "خۆیان (ئەمریکا) ده‌ڵێن ئێمه ده‌مێنینه‌وه و ناکشێینه‌وه چوونکه مه‌ترسی داعش هه‌یه و حکوومه‌تی عێراق به‌ئێمه‌ی ووتوه لێره بمێننه‌وه هەروەها تائێستا حکوومه‌تی عێراق به‌ئێمه‌ی نه‌وتوه ده‌ربچن نایانه‌وێت له‌ژێر ئه‌و فشارانه بکشێنه‌وه به‌ڵام مادام ده‌مێننه‌وه ده‌بێت به‌رگری له‌خۆیان و هاوپه‌یمانانیان بکه‌ن، به‌و شێوه‌یه بێده‌نگ نه‌بن".
ئەو سیاسەتمەدارەی کورد باسی لەوەشکرد، "به‌لای منه‌وه نازانم ئه‌مریکا ده‌کشێته‌وه یان نا چوونکه ساڵی پار تره‌مپ لێدوانیدا و خه‌ریک بو له سووریا بکشێته‌وه و دواتر مانه‌وه، له ئه‌فغانستان ده‌کشێنه‌وه و ده‌یده‌نه تاڵیبان، ده‌کرێت له عێراقیش ئه‌گه‌ر ببینن گرفتیان هه‌یه بکشێننه‌وه چونکه ئێستا عێراق (ئه‌وله‌ویه‌ت) له پێشینه نییه سه‌باره‌ت به سیاسه‌تی ئه‌مریکا شتی تر هه‌یه به‌ڵام گرینگ ئه‌وه‌یه هه‌رێم به‌شێوه‌یه‌ک هه‌ڵسوکه‌وت بکات زیاتر له‌مه باجی په‌یوه‌ندی له‌گه‌ڵ ئه‌مریکا نه‌دات، حسابێک له‌گه‌ڵ ئێرانیش بکات".
ئەوەشی ووت، ئەو هێرشانە زیانی زۆره، دیاره حکوومه‌تی عێراق وایلێهاتوه وه‌کو بونی نه‌بێت وایه گرینگی نییه چوونکه هیچ ناتوانێت بکات له‌و نێوه‌نده، له‌وه ناچێت ئەمریکا به‌ته‌مابێت هیچ شتێک به‌رامبه‌ر به‌و ملیشیایانه بکات، له‌هه‌مانکاتیشدا سه‌باره‌ت به هه‌رێمی کوردستانیش مه‌ترسیه‌که ئه‌وه‌ش مانای ئه‌وه‌یه ئه‌و توندوتیژییانه‌ی ئێران و ئه‌مریکا هه‌رێمی کوردستانیش بوه به گۆڕه‌پانێک بۆ ئه‌وه، ئێمه (هەرێم) زیان زیاتر ده‌که‌ین چوونکه سنورێکی درێژمان له‌گه‌ڵ ئێران هه‌یه له‌هه‌مانکاتیشدا حکومه‌ته‌که‌ی به‌غدا ئێران ده‌سه‌ڵاتی هه‌یه به‌سه‌ریدا، له دولاوه ئێمه زیان ده‌که‌ین.
د.مەحموود عوسمان رونیشیکردەوە، "هه‌رێم زیاتر لە عێراق زیان ده‌کات چوونکه عێراق و حکومه‌ته‌که خۆی له‌گه‌ڵ ئێراندایه له‌هه‌مانکاتیشدا پێموابوه و ئێستا ده‌یڵێم نابێت هه‌رێم زیاتر باجی ئه‌وه بدات و زۆر به‌دوای ئه‌مریکاوه نه‌ڕوات، ئه‌مریکا جێی پشتیوانی و بڕوا و پشت به‌ستن نییه بۆنمونه هێزیان له فڕۆکه‌خانه‌ی هه‌ولێره بابڕۆن ده‌ربچن له‌وێ و دوربکه‌ونه‌وه و بچنه شوێنێکی دیکه چوونکه ئێمه فڕۆکه‌خانه‌که‌مان له مه‌ترسیدایه له‌به‌ر هێزه‌کانی ئه‌مریکا، ئه‌وانیش به‌رگری له‌خۆیان ناکه‌ن له‌به‌ر ئه‌وه ده‌بێت هه‌رێم باڵانسێک ڕابگرێت له‌نێوان ئێران و ئه‌مریکا، ئێران ده‌توانێت زیان به هه‌رێم بگه‌یه‌نێت و ئه‌مریکاش به‌رگری ناکات له‌به‌رئه‌وه ده‌بێت هه‌رێم وریابێت و زۆر به‌وردی له‌و بارودۆخه بکۆڵێته‌وه".
مەحموود عوسمان دەشڵێت، "ئێران وه‌کوو په‌یامێک بۆچوونی وایه و نایشارنه‌وه که هه‌رێمی کوردستان و هه‌موو عێراق گۆڕه‌پانی ئه‌وه‌یه له‌کوێ ئه‌مه‌ریکا هه‌بێت لێی ده‌ده‌ن، بۆچونیشیان وایه له‌ناوه‌نده‌کانی خۆیان باسی ده‌که‌ن هه‌رێمی کوردستان زیاد له‌پێویست بەلای ئه‌مریکا و تورکیادا چوه و که‌متر حسابی ئێران ده‌کات، ئێرانیش به‌وه ڕازی نیین، سەردەمی قاسم سلێمانی ئه‌و پیاوێکی سیاسی بوو، زیره‌ک بوو تۆزێک له بارودۆخی هه‌رێم تێده‌گه‌یشت به‌ڵام ئه‌مانه‌ی تازه هاتوون لە بارودۆخی هه‌رێم و هه‌ستیاری بارودۆخی هه‌رێم تێناگه‌ن".
مەحموود عوسمان ڕەتیکردەوە ئێران دۆستایەتی لەگەڵ هێزە کوردییەکانی عێراق هەبێت، لەو ڕوەوە ووتی، "هه‌رگیز ئێران دۆستایه‌تی لەگەڵ کورد نه‌بوه، ئێران هیچ کاتێک بڕوای به‌کورد نه‌بوه و دۆستایه‌تیشی نه‌بوه چوونکه ئه‌گه‌ر هه‌یبێت ده‌بو ماف به‌کوردی خۆی بدایه، ملیۆنه‌ها کوردی هه‌یه هیچ مافیان نییه، به‌ڵام ئه‌و په‌یوه‌ندییانه هه‌بوه له‌نێواندا ئێستاش هه‌ر هه‌یه به‌ڵام بێگومان ئه‌وانیش سنووریان و به‌رژه‌وه‌ندیان واپێویست ده‌کات زیاتر فشار له هه‌رێم بکه‌ن و وابکه‌ن هه‌رێم زیاتر حساب بۆ ئه‌وان بکات و زیاد له‌وه به‌ره‌و ئه‌مریکا نه‌ڕوات".
بە بڕوای مەحموود عوسمان، دەبێت هەرێم داوای چۆڵکردنی فڕۆکەخانەی نێودەوڵەتی هەرێم بکات و هێزەکانی بکشێنێتەوە، لەو ڕووەوە دەڵێت، "به‌رای من ده‌بێت هەرێم وا بکات ئەو هێزانە له فڕۆکه‌خانه دوربکه‌ونه‌وه، ئه‌وه دوو سێ جار لێیان ده‌ده‌ن ئیتر ئێمه بۆ ببینه قوربانی، با دووربکه‌نه‌وه و بچێت له‌شوێنێکی دیکه بابچن لێیده‌ن که‌یفی خۆیانە به‌ڵام نابێت ئێمه ئه‌و باجه بده‌ین".
ئەم بابەتە 11988 جار خوێندراوەتەوە