مەلا بەختیار، پێشتر لە ووتارێکدا، کە لە فەیسبووکی خۆی بڵاویکردبۆوە، رایگەیاندبوو کە لەسەر دەستی هەڤاڵان ژەهرخوارد کراوم.

مەلا بەختیار ژەهرخواردکردنی بە “نامەردترین پیلان” ناودەبات و دەڵێت، “سزای رەوا چاوەڕێی تاوانبارەکانە”. ئاماژەی بەوەش کردووە کە رۆژی شەممە 13/11/2021 لە ئاڵمانیاوە دەگەڕێتەوە سلێمانی.

 مەلا بەختیار، ئەندامی ئەنجوومەنی باڵای سیاسی و بەرژەوەندییەکانی یەکێتی نیشتمانی کوردستان پەیامێکی لە لاپەڕەی تایبەتی خۆی لە تویتەر بڵاو کردەوە لەسەر ژەهرخواردکردنەکەی و نووسیویەتی: “لە نامەردترین پیلانی ژەهرپێدان رزگارم بوو، تەنها سەرشۆڕی و سزای رەوا چاوەڕێی تاوانبارەکانە”، ئەوەشی خستووەتەڕوو، “بێگومان واز لە مافی خۆم ناهێنم هەرگیز”.

مەلا بەختیار لە درێژەدا نووسیویەتی “ئەو تاوانەی بەرامبەری کراوە، تەنها لەبەر ئەوەیە کە هیچ تاوانێکم نەبووە و نییە، لەبەر ئەوەیە گەندەڵ نیم، لەبەر ئەوەیە تەکەتول نیم، لەبەر ئەوەیە نابم بە کۆیلەی پلە و پایە و پارە”.

ئەو ئەندامەی ئەنجوومەنی باڵای سیاسی و بەرژەوەندییەکانی یەکێتی نیشتمانی کوردستان باسی لەوەش کردووە کە “ئەگەر بێ هەڵوێست بوومایە، ئێستا منیش خاوەن کۆمپانیا و هەزاران دۆنم ئەرزی حەرام دەبووم”.

 دوای وەرگرتنی چارەسەری ژەهرخواردنەکە، بڕیارە رۆژی شەممە 13/11/2021 مەلا بەختیار لە ئەڵمانیاوە بگەڕێتەوە سلێمانی و بە ووتەی خۆی “لە مەراسیمێکی جەماوەریدا پێشوازی لێدەکرێت”.

 رێکەوتی 1/11/2021، مەلا بەختیار، لە ووتارێکدا، کە لە فەیسبووکی خۆی بڵاویکردەوە باسی لە هەوڵەکانی کوشتن و ژەهرخواردکردنی کردبوو، هەروەها تیشکی خستبووە سەر گۆڕانکارییەکانی نێوخۆی حیزبەکەی دوای کۆنگرەی چوارەم.

 ووتارەکە لەژێر ناونیشانی “بەراوردێک لەنێوان ژەهرخواردکردنم و هەوڵی تیرۆرکردنم 25/10/2005” بڵاوکراوەتەوە کە وەکوو خۆی باسی لێوە دەکات، لە ساڵی 2005 “ترسناکترین هەوڵی تیرۆرکردنم” جێبەجێ کراوە، بەڵام بەهۆی وەرگرتنی چارەسەرەوە نەیتوانیوە بەراوردێک لە نێوان ئەو رووداوە و وەک خۆی نووسیبووی “ژەهرخواردکردنم لەسەر دەستی (هەڤاڵان!!!) بکەم”.

ئەم بابەتە 11987 جار خوێندراوەتەوە