ناوه‌ڕۆكی كۆبوونه‌وه‌ی مه‌سروور بارزانی و نێرده‌ی یه‌كێتی ئه‌ورووپا له عێراق بڵاوكرایه‌وه
پەیامی کورد ... ناوه‌ڕۆكی كۆبوونه‌وه‌ی مه‌سروور بارزانی و نێرده‌ی یه‌كێتی ئه‌ورووپا له عێراق بڵاوكرایه‌وه
سه‌رۆكی حكوومه‌تی هه‌رێمی كوردستان له‌دیدارێكدا له‌گه‌ڵ سه‌رۆكی نێرده‌ی ڕاوێژكاری یه‌كێتی ئه‌ورووپا له عێراق گفتوگۆیان له‌باره‌ی گرینگی پێشخستنی ستراتیژی ئه‌منی كرد له‌ڕوی به‌ره‌نگاربوونه‌وه‌ی تووندوتیژی و ڕێگریكردن له تووندڕه‌وی.
به‌گوێره‌ی راگه‌ێندراوێكی حكوومه‌تی هه‌رێم، ئه‌مڕۆ چوارشه‌ممه مه‌سروور بارزانی سه‌رۆكی حكوومه‌تی هه‌رێم، پێشوازی له كریستۆف بویك سه‌رۆكی نێرده‌ی ڕاوێژكاری یه‌كێتی ئه‌ورووپا له عێراق كرد.
سه‌رۆكی نێرده‌ی ڕاوێژكاری یه‌كێتی ئه‌ورووپا له عێراق، تیشكی خسته سه‌ر ئه‌ركه‌كانی نێرده‌كه‌ی كه له ساڵی ٢٠١٧ ه‌وه له عێراقن بۆ پێشكه‌شكردنی هاوكاری ڕاوێژكاری له بواری ئه‌منی و ئه‌نجامدانی چاكسازی له هێزه‌كانی ناوخۆدا.
له كۆبوونه‌وه‌كه‌دا گفتوگۆ ده‌رباره‌ی په‌ره‌پێدانی هه‌ماهه‌نگی له نێوان دام وده‌زگا په‌یوه‌ندیداره‌كانی حكوومه‌تی هه‌رێمی كوردستان و نێرده‌ی ڕاوێژكاری یه‌كێتی ئه‌ورووپا له عێراق كرا، به‌تایبه‌تی له‌بواری ڕاهێنان و هاوكاریكردنی پۆلیس و ده‌زگا ئه‌منییه‌كانی هه‌رێمی كوردستان له ڕووبه‌ڕووبوونه‌وه‌ی تاوانی ڕێكخراو و تیرۆر، هه‌روه‌ها ئاماژه به گرینگی پێشخستنی ستراتیژی ئه‌منی كرا له به‌ره‌نگاربونه‌وه‌ی توندوتیژی و ڕێگریكردن له تووندڕه‌وی.
سه‌رۆكی حكوومه‌ت ئاماده‌یی دام وده‌زگا په‌یوه‌ندیداره‌كانی حكومه‌تی هه‌رێمی كوردستانی بۆ هه‌ر هه‌ماهه‌نگیه‌كی پێویست له گه‌ڵ نێرده‌ی ڕاوێژكاری یه‌كێتی ئه‌ورووپا له عێراق ده‌ربڕی و هیوای سه‌ركه‌وتنی بۆ خواستن له ئه‌ركه‌كانیاندا.
ئەم بابەتە 11987 جار خوێندراوەتەوە