نێچیرڤان بارزانى سه‌رۆكى هه‌رێمى كوردستان له‌گه‌ڵ وه‌زیرى ده‌ره‌وه‌ى لیتوانیا كۆبووه‌وه
پەیامی کورد ... نێچیرڤان بارزانى سه‌رۆكى هه‌رێمى كوردستان له‌گه‌ڵ وه‌زیرى ده‌ره‌وه‌ى لیتوانیا كۆبووه‌وه
به‌یانی ئه‌مڕۆ دووشه‌ممه 2022/1/17 نێچیرڤان بارزانى، سه‌رۆكى هه‌رێمى كوردستان، پێشوازى له گاربریێلیوس لاندسبێرگیس وه‌زیرى ده‌ره‌وه‌ى لیتوانیا و شاندێكى یاوه‌رى كرد.
له كۆبوونه‌وه‌یه‌كدا بره‌ودان به په‌یوه‌ندییه‌كانى عیراق و هه‌رێمى كوردستان له‌گه‌ڵ لیتوانیا، پرۆسه‌ى سیاسى و دۆخى عیراق به‌گشتى، به‌رده‌وامی هه‌ڕه‌شه‌ى داعش و به‌ره‌نگاربوونه‌وه‌ى، دۆخى ئاواره و په‌نابه‌ران له هه‌رێمى كوردستان و پرسى كۆچ و كۆچبه‌ران له كه‌مپه‌كانى ئه‌ورووپا، تاوتوێ كران.
وه‌زیرى ده‌ره‌وه‌ى لیتوانیا سوپاسى عیراق و هه‌رێمى كوردستانى كرد بۆ هه‌نگاوه‌كان و هاریكارى له چاره‌سه‌ركردنى پرسى كۆچبه‌راندا و هیواى خواست ئه‌و هاوكارییه‌ى له‌سه‌ر ئه‌م پرسه هاته ئاراوه وه‌ك ده‌رفه‌تێك بۆ هاریكاری هاوبه‌ش و بره‌ودان به په‌یوه‌ندییه‌كانى لیتوانیا له‌گه‌ڵ عیراق و هه‌رێمى كوردستان فراون بكرێت، به‌تایبه‌تى له بواره‌كانى مه‌شقى پیشه‌یى، په‌روه‌رده، بورسى خوێندن و چه‌ندین بوارى دیكه‌دا.
لاى خۆیه‌وه سه‌رۆك نێچیرڤان بارزانى، سوپاسى لیتوانیاى كرد كه به‌شێكه له هاوپه‌یمانی نێوده‌وڵه‌تی دژى داعش و یارمه‌تی عیراق و هه‌رێمى كوردستانى داوه، له‌باره‌ى پرسى كۆچیشه‌وه دووپاتى كرده‌وه كه هه‌رێمى كوردستان هه‌رگیز نابێته به‌شێك بۆ دروستكردنى كێشه بۆ وڵاتانى ئه‌ورووپا.
هه‌ردوولا هاوڕا بوون كه ده‌بێت ڕێگرى له بازرگانیكردن به مرۆڤ و به‌كارهێنانى بۆ مه‌رامى سیاسى بكرێت، بۆ ئه‌م مه‌به‌سته‌ش هاریكاریى هاوبه‌شى وڵاتان به‌تایبه‌تى عیراق و هه‌رێمى كوردستان له‌گه‌ڵ ووڵاتانى یه‌كێتیى ئه‌ورووپا، پێویسته.
تاوتوێكردنى په‌یوه‌ندییه‌كانى هه‌ولێر ـ به‌غدا، بایه‌خى په‌یوه‌ندییه‌كانى عیراق و هه‌رێمى كوردستان له‌گه‌ڵ یه‌كێتیى ئه‌ورووپا، دۆخى ناوچه‌كه به‌گشتى و چه‌ند پرسێكى دیكه‌ى جێى بایه‌خى هاوبه‌ش، ته‌وه‌رێكى دیكه‌ى كۆبوونه‌وه‌كه بوو.
ئەم بابەتە 11993 جار خوێندراوەتەوە