نێچیرڤان بارزانى، سه‌رۆكى هه‌رێمى كوردستان، پێشوازى له شاندێكى سه‌ربازی ئه‌مریكى ده‌كات
پەیامی کورد ... نێچیرڤان بارزانى، سه‌رۆكى هه‌رێمى كوردستان، پێشوازى له شاندێكى سه‌ربازی ئه‌مریكى ده‌كات
سەر لە بیانی ئه‌مڕۆ سێشه‌ممه 2022/3/1 نێچیرڤان بارزانى، سه‌رۆكى هه‌رێمى كوردستان، پێشوازى له ژەنەراڵ کیس فلپس، بەرپرسى باڵاى سەربازى و بەرپرسى نووسینگەى هاریکاری ئەمنی ئەمریکى لە عیراق كرد.
له كۆبوونه‌وه‌یه‌كدا دوایین پێشهاته ئه‌منییه‌كانى عیراق و به‌ره‌نگاربوونه‌وه‌ى هه‌ڕه‌شه و مه‌ترسییه‌كانى داعش تاوتوێ كران و جه‌خت له گرینگی هاریكارى و هه‌ماهه‌نگی نێوان پێشمه‌رگه و سوپاى عیراق كرایه‌وه، به تایبه‌تیش له‌و ناوچانه‌ى بۆشایی ئه‌منى تێدایه.
له ته‌وه‌رێكى دیكه‌ى كۆبوونه‌وه‌كه‌دا باس له دوایین هه‌نگاوه‌كانى پرۆسه‌ى چاكسازى له وه‌زاره‌تى پێشمه‌رگه كرا و هه‌ردوولا هاوڕا بوون له‌سه‌ر گرینگی یه‌كخستنه‌وه‌ى پێشمه‌رگه و به‌رده‌وامی پشتگیری ئه‌مریكایان بۆ پرۆسه‌كه و بۆ پێشكه‌شكردنى مه‌شق و ڕاهێنان به پێشمه‌رگه به پێویست زانى. هه‌ر له‌مباره‌یه‌وه شانده‌كه سوپاسى ڕۆڵى سه‌رۆك نێچیرڤان بارزانییان له پرۆسه‌ى چاكسازى و یه‌كخستنه‌وه‌ى پێشمه‌رگه‌دا كرد.
شانده ئه‌مریكییه دووپاتى كرده‌وه كه به‌ره‌نگاربوونه‌وه و تێكشكاندنى داعش بۆ ئه‌مریكا كارى له‌پێشینه‌یه و له‌مپێناوه‌شدا له نزیكه‌وه له كاركردن له‌گه‌ڵ هاوبه‌شه‌كانى له عیراق و هه‌رێمى كوردستان و ناوچه‌كه به‌رده‌وام ده‌بێت، خۆشحاڵی خۆیشیان به هاوكاری پێشمه‌رگه و سوپاى عیراق ده‌ربڕى.
په‌یوه‌ندییه‌كانى هه‌ولێر ـ به‌غدا، مه‌ترسى و هه‌ڕه‌شه‌كانى داعش له سووریا و دۆخى كه‌مپى ئه‌لهۆل له سووریا، دوایین پێشهاته‌كانى دۆخى شه‌ڕ له ئۆكرانیا و چه‌ند پرسێكى دیكه‌ى جێى بایه‌خى هاوبه‌ش، ته‌وه‌رێكى دیكه‌ى كۆبوونه‌كه بوون.
ئەم بابەتە 11989 جار خوێندراوەتەوە