پەیامی کورد      ...    نێچیرڤان بارزانى، سەرۆکى هەرێمى کوردستان، پێشوازى لە سەرۆکى پەرلەمانى شانشینى ئوردنی هاشمى و شاندێکى یاوەرى کرد

نیوەڕۆى ئەمڕۆ یەکشەممە 2021/9/5 نێچیرڤان بارزانى، سەرۆکى هەرێمى کوردستان، پێشوازى لە عەبدۆلمۆنعێم ئەلعەودات سەرۆکى پەرلەمانى شانشینى ئوردنی هاشمى و شاندێکى یاوەرى کرد.

لە کۆبوونەوەیەکدا کە سەرۆکى پەرلەمان و جێگرانى سەرۆکى هەرێمى کوردسان و جێگرانى سەرۆکى پەرلەمان و وەزیرى کاروبارى پەرلەمان و باڵیۆزى ئوردن لە عیراق ئامادەى بوون، پەیوەندییەکانى هەرێمى کوردستان و شانشینى ئوردنى و چۆنیەتی بەرەوپێشبردنیان تاوتوێ کران و هەردوولا پەیوەندییەکانیان بە مێژوویى لە قەڵەم دا.

شاندى ئوردنى، بەردەوامی پشتگیری شا عەبدوڵڵا و شانشینى ئوردنی هاشمییان بۆ هەرێمى کوردستان دووپات کردەوە و ڕێز و پێزانینیان بۆ ڕۆڵى هەرێمى کوردستان لە شەڕى دژى تیرۆر و تێکشكاندنى داعش دووپات کردەوە و بە بایەخەوە باسیان لە ڕۆڵ و پێگەى هەرێمى کوردستان لەسەر ئاستى عیراق و ناوچەکە بۆ پاراستنى هاوسەنگى و سەقامگیرى کرد.

لاى خۆیەوە سەرۆک نێچیرڤان بارزانى، سوپاس و پێزانینى هەرێمى کوردستانى بۆ پشتگیریى بەردەوامى خاوەنشکۆ شا عەبدوڵڵاى دووەم و ئوردن چ لە سەردەمە سەختەکانى ڕابردوو و چ ئێستا لە هەرێمى کوردستان دووپات کردەوە و خواستى هەرێمى کوردستانى بۆ برەودان بە هەموو بوارەکانى پەیوەندیى لەگەڵ ئوردن نیشان دا.

دۆخى سیاسى و ئەمنیى عیراق و هەرێمى کوردستان و برەودان بە بوارەکانى هاریکارى و هاوبەشى، هەڵبژردانەکانى داهاتووى عیراق، مەترسییەکانى تیرۆر و بەرەنگاربوونەوەى داعش، پەتاى کۆڤیدـ19 و لێکەوتەکانى، دەرفەتى کار و وەبەرهێنان لە هەرێمى کوردستان، پەیوەندییەکانى هەولێر ـ بەغدا و گفتوگۆى چارەسەرکردنى کێشەکانیان لەگەڵ چەند بابەتێکى جێى بایەخى هاوبەش، تەوەرێکى دیکەى کۆبوونەوەکە بوون.

ئەم بابەتە 11990 جار خوێندراوەتەوە