پەیامی کورد   ...   نێچیرڤان بارزانى له‌گه‌ڵ باڵیۆزى فه‌ڕه‌نسا كۆبووه‌وه‌

ئێوارەی چوارشەممە ٢٠٢٤/٩/٢٥ نێچیرڤان بارزانی، سەرۆکی ھەرێمی کوردستان، پێشوازی لە پاتریک دۆرێل باڵیۆزی فەڕەنسا لە عێراق کرد.

لە دیدارێکدا پەیوەندییەکانی فەڕەنسا لەگەڵ عێراق و ھەرێمی کوردستان، دوا پەرەسەندنەکانی گفتوگۆی ھەولێر ـ بەغدا بۆ چارەسەرکردنی کێشەکانی نێوانیان، دۆخی ھەرێمی کوردستان و ھەڵبژاردنی پەرلەمانی کوردستان، تاوتوێ کران.

ھەردوولا ھاوڕا بوون لەسەر ئەوەی دەرفەت و زەمینەی برەودانی زیاتر بە پەیوەندییەکانی فەڕەنسا لەگەڵ عێراق و ھەرێمی کوردستان لە ھەموو بوارەکان بەتایبەتی لە بواری ئاڵۆگۆڕی بازرگانی و ئابووریدا لەبارە. لەمبارەیەوە بیروڕایان دەربارەی دەرفەت و ھەنگاوەکان و ھاوکاری ھاوبەشییان، گۆڕییەوە.

لە دیدارەکەدا کە کونسووڵی گشتی فەڕەنسا لە ھەرێمی کوردستان، ئامادە بوو، وێڕای داکۆکیکردن لە گرینگی ھەڵبژاردن بۆ ھەرێمی کوردستان، ھیوایان خواست بانگەشەیەکی ئارام و پرۆسەی دەنگدان بە سەرکەوتوویی بەڕێوەبچێت.

دۆخی ناوچەکە بەگشتی و چەند پرسێکی دیکەی جێی بایەخی ھاوبەش، تەوەرێکی دیکەی دیدارەکە بوو.