نێچیرڤان بارزانی سه‌رۆكى هه‌رێمى كوردستان ماڵئاوایى له نوێنه‌رى یه‌كێتی ئه‌ورووپا له هه‌ولێر و باڵیۆزى فینله‌ندا له عیراق كرد
پەیامی کورد ... نێچیرڤان بارزانی سه‌رۆكى هه‌رێمى كوردستان ماڵئاوایى له نوێنه‌رى یه‌كێتی ئه‌ورووپا له هه‌ولێر و باڵیۆزى فینله‌ندا له عیراق كرد
پاشنیوه‌ڕۆى ئه‌مڕۆ سێشه‌ممه 2021/3/8 نێچیرڤان بارزانى، سه‌رۆكى هه‌رێمى كوردستان، دواى به‌كۆتاهاتنى ئه‌ركه‌كه‌یان و به مه‌به‌ستى ماڵئاوایى، به جیا پێشوازى له هه‌ریه‌كه له ڤەنسە گیووم پۆپۆ، نوێنه‌رى یه‌كێتی ئه‌ورووپا له هه‌ولێر و ڤێسا هاككینن باڵیۆزى فینله‌ندا له عیراق كرد.
له دیداریاندا سه‌رۆك نێچیرڤان بارزانى وێڕاى ماڵئاوایى، سوپاس و پێزانینى بۆ كاره‌كانى هه‌ردووكیان له هه‌رێمى كوردستان و عیراق نیشان دا و ده‌ستخۆشى لێكردن، هه‌روه‌ها له ئه‌ركى تازه‌یاندا هیواى سه‌ركه‌وتنى بۆ خواستن.
لاى خۆیانه‌وه هەریەکەە لە نوێنه‌رى یه‌كێتی ئه‌ورووپا له هه‌ولێر و باڵیۆزى فینله‌ندا له عیراق سوپاسى سه‌رۆك نێچیرڤان بارزانى و لایه‌نه په‌یوه‌نداره‌كانى هه‌رێمى كوردستانیان كرد بۆ ئه‌و هاوكارى و پشتگیرییه‌ى له ماوه‌ى به‌ڕێكردنى ئه‌ركیاندا لێیان كراوه و پابه‌ندی یه‌كێتی ئه‌ورووپا و فینله‌ندایان به به‌ره‌وپێشبردنى زیاترى په‌یوه‌ندییه‌كانیان له‌گه‌ڵ هه‌رێمى كوردستان دووپات كرده‌وه.
له‌گه‌ڵ نوێنه‌رى یه‌كێتی ئه‌ورووپا له هه‌ولێر سه‌رۆك نێچیرڤان بارزانى جه‌ختى له پابه‌ندی هه‌رێمى كوردستان به پاراستنى مافه‌كانى مرۆڤ و ئازادییه‌كان و ئازادی ڕاده‌ربڕین و باشتركردنى كارى دادگاكان و ده‌سه‌ڵاتى دادوه‌رى كرده‌وه و له‌مباره‌یه‌وه سوودوه‌رگرتنى هه‌رێمى كوردستانى له ئه‌زموونى یه‌كێتی ئه‌ورووپا به پێوست زانى.
تاوتوێكردنى بڵابوونه‌وه‌ى ڤیرووسى كۆرۆنا و جۆره گۆڕاوه‌كه‌ى ناسراو به ده‌ڵتا كۆرۆنا، دۆخى هه‌رێمى كوردستان، مه‌ترسییه‌كانى تیرۆر و هه‌ڕه‌شه‌كانى داعش، ڕۆڵى ووڵاتانى یه‌كێتی ئه‌ورووپا و فینله‌ندا له هه‌رێمى كوردستان و عیراق، ته‌وه‌رێكى دیكه‌ى دیداره‌كان بوو.
ئەم بابەتە 11988 جار خوێندراوەتەوە