نێچیرڤان بارزانی سەرۆكی هەرێمی كوردستان پێشوازی لە پارێزگاری ئازه‌ربایجانی ڕۆژئاوا کرد
پەیامی کورد ... نێچیرڤان بارزانی سەرۆكی هەرێمی كوردستان پێشوازی لە پارێزگاری ئازه‌ربایجانی ڕۆژئاوا کرد
نیوەڕۆی ئەمڕۆ سێشەممە 23/8/2022 نێچیرڤان بارزانی، سەرۆكی هەرێمی كوردستان، پێشوازی لە محەمەد سادق موعتەمدیان پارێزگاری ئازه‌ربایجانی ڕۆژئاوای كۆماری ئیسلامی ئێران و شاندێكی یاوەری كرد.
لە دیدارێكدا پەیوەندییەكانی نێوان هەرێمی كوردستان و كۆماری ئیسلامی ئێران، ئاسانكاری و هەماهەنگی زیاتر بۆ پەیوەندی ئابوورى و ئاڵوگۆڕی بازرگانی نێوان هەردوولا و هاتووچۆی زیارەتكارانی شوێنە ئاینییەكان و گەشتیارانى ئێران بۆ عێراق لە دەروازە سنوورییەكانى هه‌رێمى كوردستانه‌وه، تاوتوێ كران.
شاندی میوان خۆشحاڵی خۆیان بە سەردانی هەرێمی كوردستان و دەرفەتی دیدار لەگەڵ سەرۆك نێچیرڤان بارزانی نیشان دا و دووپاتیان كردەوە كە بۆ زیاتر بەرەوپێشبردنی پەیوەندییە بازرگانییەكان، هەموو هەوڵێك دەدەن و هه‌موو ئاسانكارییه‌ك پێشكه‌ش ده‌كه‌ن.
لای خۆیەوە سەرۆك نێچیرڤان بارزانی تیشكی خستە سەر پەیوەندییە دێرینەكانی نێوان هەرێمی كوردستان و كۆماری ئیسلامیی ئێران لە هەموو بوارەكاندا و جەختی لە بەرەوپێشبردنی زیاترى پەیوەندییەكان كردەوە، هه‌روه‌ها دیدی هەرێمی كوردستانی لەمبارەیەوە خستە ڕوو كە لە بوارە جیاوازەكاندا خوازیارى باشترین پەیوەندی و هاوكاری و هاریكارییه لەگەڵ ووڵاتانی دراوسێ.
تاوتوێكردنی دۆخی سیاسی ناوچەكە بەگشتی و چەند بابەتێكی جێی بایەخی هاوبەش، لایەنێكی دیكەی دیدارەكە بوو كە پارێزگاری هەولێر، سەرۆكی ئیدارەی سۆران و سه‌رکونسوولی گشتی كۆماری ئیسلامی ئێران لە هەولێر ئامادەی بوون.
ئەم بابەتە 11988 جار خوێندراوەتەوە