پەیامی کورد      ...   نێچیرڤان بارزانی سەرۆکى هەرێمى کوردستان و باڵیۆزى ڕووسیا پەیوەندییەکانى هەولێر ـ مۆسکۆ تاوتوێ دەکەن

سەرۆکى هەرێمى کوردستان و باڵیۆزى ڕووسیا لە عێراق جەخت لە پەرەپێدانى زیاترى پەیوەندییەکان و سەردانى زیاترى شاندەکانى هەردوولا دەکەنەوە و هاوڕا بوون کە پەیوەندییەکانى هەولێر ـ مۆسکۆ بە تەنیا لە بوارى هاریکاری ووزەدا نەمێننەوە و فراونتر و هەمەلایەن بکرێن، بەتایبەتیش لە هەردوو بوارى کشتوکاڵ و پیشەسازیدا، بۆ ئەم مەبەستەش لە هەردوولاوە هەنگاوى کردەیى بنێن و نوێنەرانى هەرێمى کوردستان بەشدارى لە شاندەکانى عێراقدا بۆ ڕووسیا بکەن.

پێشنیوەڕۆى ئەمڕۆ سێشەممە 1/11/2020  نێچیرڤان بارزانى، سەرۆکى هەرێمى کوردستان، پێشوازى لە ماکسیم ماکسیمۆڤ، باڵیۆزى ڕووسیا لە عێراق و شاندێکى یاوەرى کرد.

لە کۆبوونەوەیەکدا کە کونسولى گشتی ڕووسیا لە هەولێر ئامادەى بوو، پەیوەندییەکانى هەرێمى کوردستان و عێراق لەگەڵ ڕووسیا، کارى کۆمپانیا ڕووسییەکانى ووزە لە هەرێمى کوردستان، دوایین پێشهاتەکانى دۆخى سیاسى و ئەمنی عێراق، هەڵبژاردنەکانى داهاتووى عێراق، پەیوەندییەکانى هەولێر ـ بەغدا و گفتوگۆى چارەسەرکردنى کێشەکانیان، مەترسییەکانى تیرۆر و بەرەنگاربوونەوەى داعش و چەند پرسێکى دیکەى جێى بایەخى هاوبەشیان خستە بەر باس.

هەردوولا جەختیان لەوە کردەوە کە دەرفەت و زەمینە لەبارە بۆ ئەوەى پەیوەندییەکانى هەرێمى کوردستان لەگەڵ ڕووسیا فراونتر و هەمەلایەنە بکرێن و لە قۆناغەکانى داهاتوودا گرینگی زیاتر بە برەودان بە پەیوەندییەکانیان لە هەردوو بوارى کشتوکاڵ و پیشەسازیدا بدرێت، هەروەها ئاسانکارى لە بوارى هاتووچۆى نێوان هەرێمى کوردستان و ڕووسیا فراوانتر بکرێت، بۆ ئەم مەبەستەش بیرۆکەى هەبوونى گەشتیى ئاسمانی ڕاستەوخۆى هەولێر ـ مۆسکۆ تاوتوێ کرا.

ئەم بابەتە 11992 جار خوێندراوەتەوە