نێچیرڤان بارزانی لەگەڵ سکرتێری گشتی ناتۆ كۆبووه‌وه
پەیامی کورد ... نێچیرڤان بارزانی لەگەڵ سکرتێری گشتی ناتۆ كۆبووه‌وه
له کۆنفرانسی ئاسایشی میوونشن، ئێواره‌ى شەممە 2025/2/15 نێچیرڤان بارزانی، سەرۆکی هەرێمی کوردستان، لەگەڵ مارک ڕۆته، سکرتێری گشتی پەیمانی باکووری ئاتڵه‌نتیك (ناتۆ)، کۆبووەوە.
لە کۆبوونەوەکەدا پێشهاتە ئەمنییەکانی عێراق و ناوچەکە و گرینگی بەهێزکردنی په‌یوه‌ندی و هاوکاری ناتۆ له‌گه‌ڵ عێراق و هەرێمی کوردستان، بەتایبەتی لە بواری بەرەنگاربوونەوەی تیرۆر و ڕاهێنانی هێزە ئەمنییەکاندا، تاوتوێ كرا.
سەرۆک نێچیرڤان بارزانی سوپاس و پێزانینی هەرێمی کوردستانی بۆ پشتگیری ناتۆ لە بواری بەهێزکردنی تواناکانی بەرگری هێزەکانی پێشمەرگە دەربڕی و جەختی لەسەر گرینگی بەردەوامی ئەم پشتگیرییە لەپێناو پاراستنى سەقامگیری و ئاسایش لە ناوچەکەدا، کردەوە.
لاى خۆیەوە مارک ڕۆته، پابەندی ناتۆی بۆ بەردەوامی پشتگیری عێراق و هەرێمی کوردستان دووپات کردەوە، هەروەها ئاماژەی بە گرینگی هاوبەشی لەگەڵ هەرێمى كوردستاندا کرد بۆ دەستەبەرکردنی ئاسایش و سەقامگیری عێراق و ڕووبەڕووبوونەوەی هەڕەشە تیرۆریستییەکان له ناوچه‌كه.
دۆخی سووریا و پێشهاته‌كانى ڕۆژهه‌ڵاتى ناوه‌ڕاست، لایه‌نێكى دیكه‌ى گفتوگۆکانی كۆبوونه‌وه‌كه بوو.
ئەم بابەتە 62 جار خوێندراوەتەوە