پەیامی کورد    ...   نێچیرڤان بارزانی : کاتی ئەوە هاتووە سلێمانی وەکوو جاران پێشەنگ بێت

بە ئامادەبوونی نێچیرڤان بارزانی، جێگری سەرۆکی پارتی دیموکراتی کوردستان بانگەشەی لیستی 275ـی پارتی لە سلێمانی بەڕێوەچوو.

نێچیرڤان بارزانی لە ووتارێک دا ووتی : لەسلێمانییەوە سڵاو بۆ جەماوەری پارتی لە سلێمانی و هەڵەبجە دەنێرم، ئێوە بەشێکی گرینگن لە مێژووی پارتی دیموکراتی کوردستان، پارتی بە ئێوە سەربەرزە و بە ئێوە بە سەربەرزی دەمێنێتەوە.

جێگری سەرۆکی پارتی ئاماژەی بەوەش دا "پارتی خاوەنی ئێوەیە، ئێوەش خاوەنی پارتیین، خاوەنی ڕێبازی بارزانین، پارتی سلێمانییە، سلێمانییش هەر پارتییە."

نێچیرڤان بارزانی، بە جەماوەری پارتی لە سنووری سلێمانی و هەڵەبجە ڕاگەیاند "ئێوەش بەشێکی گرینگن لە کەمپینی یەک ملیۆن و زیاتر بۆ لیستی 275ـی پارتی دیموکراتی کوردستان، چاوەڕێین ژمارەی دەنگەکانتان لە ئاست خەبات و مێژووی پارتیدا بێت لەم شارە، لەم دەڤەرە، یەک ملیۆن بەبێ ئێوە تامی تێدا نییە، دەبێت یەک ملیۆن بێت."

جێگری سەرۆکی پارتی ووتیشی "من پەیامی یەک ملیۆنم بۆ ئێوە هێنا بوو، بەڵام کە ئێوە دەبینم پەیامەکەم لە یەک ملیۆن زیاتر سەرکەوت، ئێمەش ئامادەین بۆ ئەو هەموو تەحەدییانەی لە عێراق بەرامبەر ئێمە دەکرێت، دڵنیابن دڵخۆشی ئێوە دڵخۆشی ئێمەیە و خەمی ئێوەش خەمی ئێمەیە، داواکاری ئێوە ئەرکی سەرشانمانە، با ڕاستییەک بڵێم لەم ناوچەیە نوێنەرایەتیی پارتی کەمە، بەڵام دڵنیابن لەوەی بەرنامەی پارتی بۆ ئەم ناوچەیە گەورەیە."

نێچیرڤان بارزانی، جەختیشی کردەوە، پێمان وایە هەرێمی کوردستان بەبێ ئەم ناوچەیە ناتەواوە، پارتی بەبێ ئەم ناوچەیە ناتەواوە، لەبەر ئەوە خەمی ئێوە خەمی ئێمەیە، ئێمە لە پارتی سەیری کەموکوڕییەکانی هەردوو پارێزگاکانی هەڵەبجە و سلێمانی و ئیدارە سەربەخۆوەکانی گەرمیان و ڕاپەرین ناکەین، هەروەها کەم وکوڕییەکان مایەی دڵخۆشی نین بۆ پارتی، بەڵکوو خەمێکی گەورەن بۆ پارتی دیموکراتی کوردستان.

نێچیرڤان بارزانی، باسی لەوەش کرد، ئێمە وەکوو بەشێکی خۆشەویستی کوردستان سەیری ئەم ناوچەیە دەکەین، پارتی حزبی سەرانسەری کوردستانە، پارتی ناوچەگەرێتی لەبیر کردووە، ناوچەگەرییەتی لە بیری پارتی شوێنی نەماوە و نامێنێ.

جێگری سەرۆکی پارتی ئاماژەی بەوەش دا، پارتی بوو یەکەم جار شۆڕشی سەرانسەری کوردستانی بەرپا کرد، لەبەر ئەوە هیچ پارتیەک بە جیاکاری و جیاوازی سەیری هیچ شوێنێکی کوردستان ناکات، کە شەقامێک لە هەڵەبجە، یان لە زاخۆ درووست دەکرێت ئێمە پێی دڵخۆش دەبین.

ڕاشیگەیاند، ئاسمانی سلێمانی بەشێکی جوانی کوردستانە، ئەگەر ئاسمانی سلێمانی گەشتی کەم بێت، ئەوە گەشتی ئاسمانی لە کوردستان کەم دەبێت. ئاسمان و خاکی ئێمە یەک ناویان هەیە ئەویش 'کوردستانە'.

نێچیرڤان بارزانی دەشڵێت: نابێت زۆنی سەوز و زەرد هەبێت، دەبێت یەک زۆن هەبێت ئەویش زۆنی کوردستانە، ڕاستە کەموکووڕی هەیە، بەعس زۆربەی شوێنەکانی وێران کرد، شەڕی داعش کاروانی ئاوەدان کردنەوە و پێش خستنی کوردستانی سست کرد، هێرشی کردە سەر پێشمەرگە، بەڵام نەیپرسی خوێنی کامەتان سەوزە و خوێنی کامەتان زەردە، هەروەها پێشمەرگە قارەمانەکان هەموو پێکەوە بەرگرییان لە کوردستان کرد و ئاوەدانییەکی زۆر لە کوردستان درووست بوو؛ بەڵام هێشتا بەدڵمان نییە و دەبێت خێراتر و زیاتر و باشتری بکەین.

جێگری سەرۆکی پارتی جەختیشی کردەوە، خەڵکی کوردستان شاهێدن، لەهەر شوێنێک پارتی بوونی هەبێت، ئاوەدانی و خزمەتگوزاری زیاتر دەبێت، پارتی ئەمەی بە کردەوە سەلماندووە. پارتی بڕوانامەی ئاوەدانی لە خەڵکی کوردستان وەرگرتووە.

نێچیرڤان بارزانی دەشڵێت: کاتی ئەوە هاتووە سلێمانی وەکوو جاران بگەڕێتەوە و پێشەنگی زانست و مەعریفە و دەستپێشخەری سیاسی و ڕۆشنبیری بێت. سلێمانی لەسەدەی 20 شارێکی پێشەنگ بوو، ڕۆلەکانی بەشدار بوون لە دامەزراندن و سەرهەڵدانی قوتابخانە و فێربوون. دامەزراوەی سوپا، دادگای دەوڵەت، یەکەمین زانکۆ، یەکەمین بزاڤی ڕۆشنبیری، جووڵانەوەی سیاسی و ئەدەبی هونەری، دژی ستەمکاران بوون.

ئەم بابەتە 10 جار خوێندراوەتەوە