پەیامی کورد      ...    نەهرۆ کەسنەزانی : ئەو شەوی کە خەریک بووە گرژی گەورە لە سلێمانی درووست بێت پەیوەندیم بە باڤڵ و قۆباد تاڵەبانی یەوە کرد و دۆخەکە هێور بووەوە

 نەهرۆ كەسنەزانی، سەرۆكی تەریقەتی كەسنەزانی لە جیهان رایگەیاند، بەردەوام پەیوەندی بە هاوسەرۆكانی یەكێتی نیشتیمانی كوردستانەوە دەکات تاوەكوو كێشەكانیان چارەسەر بكەن و نەگاتە بنبەست، لە هەمانكاتدا شاندێكی مامۆستایانی ئایینی بە نوێنەرایەتی مامۆستا مەلا عەبدلۆەهاب بەرزنجی، ئەندامی ئەنجوومەنی كەسنەزانی، بەمەبەستی چارەسەركردنی كێشەكان سەردانی هاوسەرۆكانی یەكێتی نیشتیمانی كوردستانیان كردوە.
شێخ نەهرۆ كەسنەزانی لەلێدوانێكی رۆژنامەوانیدا لە بارەگای سەرۆكایەتی تەریقەتەكە لە سلێمانی رایگەیاند، ئەوان هەمیشە لەپەیوەندیدان لەگەڵ هەردوو هاوسەرۆک بافڵ تاڵەبانی و لاهوور شێخ جەنگی.

ئاماژەی بەوەشکرد، "سەرەڕای پەیوەندی تەلەفۆنی بەردەوام بەهاوسەرۆكانی یەكێتیەوە، دووبارە سەردانی بافڵ تاڵەبانی، هاوسەرۆكی یەكێتی و قوباد تاڵەبانی، جێگری سەرۆكی حكوومەتی هەرێمی كوردستانی كردوە بەمەبەستی چارەسەركردنی كێشەكان، ئەو شەوەی كە خەریك بو گرژییەك لە سلێمانی درووست بێت پەیوەندی پێوەكردوون و بارودۆخەكەی هێوركردوەتەوە".

بەپێی راگەێندراوێکی تەریقەتی كەسنەزانی لە جیهان، "هەر لەسەرەتای دروستبونی كێشەكانی یەكێتی نیشتیمانی كوردستان شێخ نەهرۆ كەسنەزانی سەردانی بافڵ تاڵەبانی و لاهوور شێخ جەنگی هاوسەرۆكانی یەكێتی كرد و بەڵێنیان پێدابوو كە لەدانیشتن و دیالۆگ و گفتوگۆ بەردەوامبن و بەزووترین كات كێشەكانی یەكێتی نێشتیمانی كوردستان چارەسەربكەن،.
لەلایەكی دیكەوە شاندێكی مامۆستایانی ئایینی بە نوێنەرایەتی مامۆستا مەلا عەبدلۆەهاب بەرزنجی ئەندامی ئەنجووومەنی كەسنەزانی سەردانی بافڵ تاڵەبانی و لاهوور شێخ جەنگی هاوسەرۆكانی یەكێتی نیشتیمانی كوردستان كرد و داوایان لێكردن بە زووترین كات كۆتایی بەكێشەكانیان بهێنن.
عەبدلۆەهاب لەلێدوانێكی رۆژنامەوانی لە بارەگای سەرۆكایەتی تەریقەتی كەسنەزانی لەسلێمانی رایگەیاند، "دەرگای گفتوگۆ و دیالۆگ لەنێوان ئێمە و هاوسەرۆكانی یەكێتی بەڕوماندا دانەخراوە و بە واڵایی ماوەتەوە و هێوادارین بتوانین لەرێگای ئەو دەرگایەوە كێشەكان چارەسەربكەین".

ئەم بابەتە 11991 جار خوێندراوەتەوە