پەیامی کورد      ...  هاووڵاتییەک پاش بانگهێشتکردنی بۆ دەزگای هەواڵگری پارێزگای سنە دەست بەسەر کرا

ڕۆژی پێنجشەممە ٥ی ئۆگۆست ، هاووڵاتییەکی کورد بە ناوی "مادێح فەتحی"، کوڕی موحەممەد و خەڵکی سنە، پاش بانگهێشتکردنی بۆ ئیدارەی هەواڵگری و زانیاری سنە، دەست بەسەر کرا.

بە وتەی سەرچاوەیەکی ئاگادار، ئەو هاووڵاتییە بە تۆمەتی بەشداری لە ڕێوڕەسمی پرسەی "ئیدریس فەقیهی"، یەکێک لە ئەندامانی گیانلەدەستداوی پارتی ژیانی ئازادی کوردستان "پژاک"، بانگهێشتی ئیدارەی ئیتلاعاتی سنە کراوە.

ئەو سەرچاوە ئاگادارە هەروەها وتوویەتی: "مادێح فەتحی پاش دەست بەسەرکردنی دەستی داوەتە مانگرتن".

ڕۆژی دووشەممە ٢ی ئۆگۆست ٢٠٢١، هێزەکانی دەزگای هەواڵگری بە بێ بەڵگەی یاسایی هەڵیانکوتایە سەر ماڵی ئەو هاووڵاتییە کوردە لە شارەکی "بەهاران" و پاش پشکنینی ماڵەکەی، ناوبراویان دەسبەسەر کردبوو.

ڕۆژی پێنجشەممە ساڵی ٢٠٢٠، "سەحەر کازمی"، چالاکی مەدەنی و ژینگەپارێزی، و هاوژینی مادیح فەتحی، پاش تەواوبوونی ماوەی زیندانییەکەی لە بەندی ژنانی زیندانی سنە ئازاد کرابوو.

ئەو چالاکە مەدەنییە مانگی بەفرانباری ساڵی ٢٠١٨، لەلایەن لقی یەکی دادگای شۆڕش سنە، بە سەرۆکایەتی "سەعیدی"، بە تۆمەتی "هەوڵدان دژی تەناهی نەتەوەیی" بە ٥ ساڵ زیندانی تەعزیری مەحکووم  کرابوو کە ئەو حوکمە لەلایەن لقی ٤ی دادگای پێداچوونەوەی سنەوە بۆ ٢٠ مانگ کەم کرابووە.

"سەحەر کازمی"، ڕۆژی پێنجشەممە ١٨ی گەلاوێژی ٢٠١٨ ،  لەلایەن هێزەکانی دەزگای هەواڵگرییەوە دەسبەسەر کرا، هەروەها، ڕۆژی پێنجشەممە ٢٤ی خەزەڵوەر، "مادێح فەتحی" هاوژینی "سەحەر کازمی"، چالاکی مەدەنی و دایکی ئەو چالاکە مەدەنییە بە ناوی "مەهوەش ئەمیری"، پاش بانگهێشتکردنیان بۆ ئیدارەی ئیتلاعاتی سنە دەسبەسەر کرابوون.

ئەم بابەتە 11990 جار خوێندراوەتەوە