پەیامی کورد      ...    هەوڵی ڕفاندنی ئەم ژنە ڕۆژنامەنووسە لە لایەن ئەمریکاوە پووچەڵ کرایەوە
 وەزارەتی دادی ئەمریکا ڕایگەیاند، کە پیلانی تۆڕێکی هەواڵگیری کۆماری ئیسلامی بۆ ڕفاندنی ژنە ڕۆژنامەنووسێک پوچەڵ کردووەتەوە و تۆمەتبارێکی دەستگیر کردووە.

شەوی ڕابردوو، وەزارەتی دادی ئەمریکا ئاشکرای کرد، کە تۆڕێکی دەزگای سیخوڕی کۆماری ئیسلامی هەوڵی داوە ژنە ڕۆژنامەنووسێکی ئێران کە هاوکات چالاکی بواری مافی مرۆڤیشە، بڕفێنن. داواکاری گشتی ویلایەتە یەکگرتووەکان و وەزارەتی دادی ئەو ووڵاتە، لە دوو ڕاگەێندراوی جیاواز، ناوی ئەندامانی ئەو تۆڕە سیخوڕییەی ئێرانیان ئاشکرا کردووە و ڕایانگەیاندووە کە یەکێکیان دەستگیر کراوە.

لە ڕاگەیێندراوەکەی وەزارەتی داد هاتووە: "عەلیڕەزا فەراهانی، مەحموود خازعین، کیا سادقی، ئومێد نووری و نیلوفەر بەهادۆری، تۆمەتبارن بە ئەنجامدانی هەندێک تاوان، لەوانە؛ ڕفاندن، گواستنەوەی پارە، سپیکردنەوەی پارە، قاچاخ، فێڵ و ساختەکاری لە ئەمریکا". بەپێی ڕاگەێندراوەکەی داواکاری گشتی ، یەکێک لەو کەسانە بەناوی "نیلوفەر بەهادوری" لە کالیفۆرنیا دەستگیر کراوە و دەدرێتە دادگا، بەڵام ئەوانی دیکە گەڕاونەتەوە بۆ ئێران.

 هەر لەو ڕاگەیێندراوەکەدا هاتووە: ئەم تۆڕە لە لایەن کەسێک بەناوی "عەلیڕەزا فەراهان"ـیەوە فەرماندەیی کراوە و لە چەندین ووڵاتی دیکە لەوانە کەنەدا، ئیمارات و بەریتانیا، چەندین قوربانیی دیکەشیان وەک ئامانج دەستنیشان کردووە بۆ ڕفاندن یان تیرۆرکردن.

 لە ڕاگەیێندراوەکانی داواکاری گشتی ویلایەتە یەکگرتووەکان و وەزارەتی دادی ئەو ووڵاتە، هیچ ئاماژەیەک بە ناوی ئەو ڕۆژنامەنووسە نەکراوە و تەنیا وتراوە کە ڕۆژنامەنووس و چالاکوانێکی بواری مافی مرۆڤە، بەڵام دەنگی ئەمریکا چاوپێکەوتنێکی لەگەڵ ئەو ژنە ڕۆژنامەنووسە بە ناوی "مەسیح عەلینەژاد" کردووە کە باسی بەسەرهاتی خۆی دەکات و پێشتر ئەو هەڕەشانەی لێکراوە.

هەر بەپێی دەنگی ئەمریکا "مەحموود خازعین" ناسراو بە "حاج مەحموود" کە یەکێک لە تۆمەتبارانی ئەو دۆسیەیە، پەیوەندییەکی زۆری لەگەڵ هونەرمەندانی ناسراوی ئێرانى هەیە و لە ڕەواڵەتدا کاری ڕێکخستنی جەژن و بۆنەکانی هونەرمەندانى لە ئەستۆیە، بەڵام خۆی یەکێک لە ئەندامانی دەزگای سیخوڕی دەسەڵاتی ئێرانە.

ئەم بابەتە 11988 جار خوێندراوەتەوە