وه‌زاره‌تى بازرگانى و پیشه‌سازى کوردستان و کونسووڵخانەی ئاڵمانیا تاوتوێى په‌ره‌پێدانى ئابوورى و پرۆژه‌ى هاوبه‌ش ده‌که‌ن
پەیامی کورد ... وه‌زاره‌تى بازرگانى و پیشه‌سازى کوردستان و کونسووڵخانەی ئاڵمانیا تاوتوێى په‌ره‌پێدانى ئابوورى و پرۆژه‌ى هاوبه‌ش ده‌که‌ن
وه‌زاره‌تى بازرگانى و پیشه‌سازى و کونسووڵخانەی ئاڵمانیا تاوتوێى په‌ره‌پێدانى ئابوورى و پرۆژه‌ى هاوبه‌ش ده‌که‌ن و به‌ڕێوبه‌رى گشتی وه‌زاره‌تى بازرگانیش ده‌ڵێت: "ئاڵمانیا له ڕووى پیشه‌سازى و بازرگانییه‌وه، یه‌کێکه له ووڵاته پێشکه‌وتووە‌کان و کاریگه‌ری له‌سه‌ر ئابووری جیهان هه‌یه و، ئاڵمانیا له‌گه‌ڵ ئه‌وه‌ى ووڵاتێکى پیشه‌سازییه، له ڕووى داهاتە کشتوکاڵی یه‌کانیشه‌وه به سێیه‌م ووڵاتى گه‌وره‌ى جیهان داده‌نرێت و جێ په‌نجه‌ى ئه‌م ووڵاته به‌ئاشکرا به‌سه‌ر ئابووری ووڵاتانه‌وه ده‌بینرێت".
نه‌وزاد کامیل، به‌ڕێوبه‌رى گشتی وه‌زاره‌تى بازرگانی حکوومه‌تى هه‌رێمى کوردستان، ڕایگه‌یاند: "ئاڵمانیا هه‌ر له‌دواى ڕاپه‌ڕینه‌وه یه‌کێک بووه لەو ووڵاتانەی که له بواره جۆربه‌جۆره‌کاندا له‌گه‌ڵ هه‌رێمى کوردستان په‌یوه‌ندیى هه‌بووه، ئه‌م په‌یوه‌ندی یانه زیاتر له بوارى بازرگانى و هاورده‌کردنى کاڵا و شت ومه‌ک بووه، ئێستا ژماره‌یه‌ک کۆمپانیاى ئاڵمانیا له هه‌رێمدا پرۆژه‌یان هه‌یه و به‌فعلى له سێکته‌ر و دامه‌زراوه‌کاندا ڕۆڵیان هه‌یه، له تازه‌ترین هه‌وڵیشدا به‌پێى ئه‌و لێکتێگه‌یشتنه‌ى که کردوومانه له‌گه‌ڵ به‌رپرسى به‌شى ئابوورى و مرۆیی کونسووڵخانەی ئاڵمانیا له هه‌ولێر، ئاماده‌یی خۆیان ده‌ڕبڕیوه بۆ کارى وه‌به‌رهێنان و پته‌وکردنى ژێرخانى ئابوورى و گواستنه‌وه‌ى ئه‌زموونى ووڵاته‌که‌یان بۆ کوردستان و ناردنى تیمى ڕاوێژکارى و پێشکه‌شکردنى هه‌ر هاوکارییه‌ک به دامه‌زراوه‌کانى حکوومه‌ت، به‌تایبه‌ت له ڕووى پیشه‌سازییه‌وه، چونکه ئاڵمانیا به سرووشتى خۆى ووڵاتێکى پیشه‌سازییه، بۆیه زیاتر جه‌ختیان له‌م بواره کردەوە.''
ووتیشى: "ئه‌وه‌ى په‌یوه‌ندیداره به هه‌رێمى کوردستانەوە، وه‌زاره‌تى بازرگانی هه‌رێم ئاماده‌ى هه‌ر هاوکارى و کارئاسانییه‌که بۆ هاتنى کۆمپانیا ئاڵمانییه‌کان، به‌هۆى ئه‌وه‌ى گشت فاکته‌ره‌کانى سه‌رکه‌وتن و ئه‌نجامدانى بزنس و پرۆژه‌کان له هه‌رێمى کوردستان به‌رجه‌سته ده‌بێت، له ڕووى کشتوکاڵی یشه‌وه خاوه‌نى داهاتێکی یه‌کجار زۆر گه‌وره‌یه و ده‌توانرێت وه‌به‌رهێنان له به‌روبوومه کشتوکاڵی یه‌کاندا بکرێت و بگۆڕدرێت بۆ سه‌رچاوه‌ى خۆراکی دیکه، ته‌نانه‌ت ده‌توانرێت کارگەی گه‌وره درووست بکرێت، بێگومان ئاڵمانیا ده‌توانێ ئه‌م ڕۆڵە بگێڕیت".
ڕوونیشى کرده‌وه: ''به‌پێى ئه‌و لێکتێگه‌یشتنه‌ى که له نێوان هه‌رێم و ئاڵمانیادا درووست بووه، له داهاتوودا هه‌نگاوه کرده‌ییه‌کان له نێوان هه‌ردوولادا ده‌چێته بوارى جێبه‌جێکرنه‌وه و ئاڵمانیاش وه‌ک هه‌ر ده‌وڵەتێکى خاوه‌ن ئابووری پێشکه‌وتووی دیکه ده‌بێته یه‌کێک له‌و ووڵاتانه‌ى که کار بۆ پێشخستنى سه‌رخان و ژێرخانى ئابووری هه‌رێم ده‌کات".
ئەم بابەتە 11986 جار خوێندراوەتەوە