پەیامی کورد   ...  ووتاری مەسروور بارزانی سەرۆکی حکوومەتی هەرێمی کوردستان لە ڕێورەسمی ناساندنی بڕاند و ماڵپەڕی Invest Kurdistan

ئێوارەی ئەمڕۆ دووشەممە 6/19 بە ئامادەبوونی مەسروور بارزانی سەرۆکی حکوومەتی هەرێمی کوردستان،  ڕێورەسمی ناساندنی بڕاند و وێب سایتی ئینڤێست کوردستان Invest Kurdistan بەڕێوەدەچوو . 

لە ڕێورەسمەکەدا کە لەلایەن دەستەی وەبەرهێنانی حکوومەتی هەرێمی کوردستانەوە ڕێکخرابوو ، ژمارەیەکی زۆر لە وەبەرهێنەرانی ناوخۆ و دەرەوەی کوردستان و کونسوول و دیپلومات و نوێنەری ووڵاتان لە هەرێمی کوردستان بەشدار بوون، سەرۆکی حکوومەت ووتارێکی پێشکەش کرد و جەختی لەوە کردەوە کە هەموو هەوڵێک دەدەین تاکوو وەبەرهێنەرانی  ناوخۆ و دەرەوە، متمانەی زیاتر بە بازاڕی هەرێمی کوردستان بکەن. ووتیشی  هەر زوو هەوڵمان داوە کە هەموو بەربەستە یاسایی و بیرۆکراسییەکان لە بەردەم پرۆسەی وەبەرهێنان هەڵگرین. کاری زۆر کراوە، بەڵام دەزانین کاری زۆرتریش ماوە بۆ ئەوەی ئاسانکاری زیاتر بۆ وەبەرهێنەران بکەین.

ئەمەش دەقی ووتارەکەی سەرۆکی حکوومەتی هەرێمی کوردستانە :

بە ناوی خوای گەورە و میهرەبان 

ئامادەبووانی بەڕێز :

هەموو لایەک زۆربەخێر بێن، خۆشحالم کە ئەمرۆ لە گەل ئێوەی بەڕێزم بۆ ڕاگەیاندنی ماڵپەڕ و پلاتفۆرمێکی ئۆنلاین، کە تایبەتە بە وەبەرهێنان لە هەرێمی کوردستان، بە ناوی  Invest Kurdistan .

مەبەست لەم پلاتفۆرمە ، پەرەپێدانی زیاتری پرۆسەی وەبەرهێنان و ئاسانکاری کردنە بۆ وەبەرهێنەرانی ناوخۆ و دەرەوە، بۆ ئەوەی بە شێوەیەکی خێرا و بە ئاسانی، زانیاری پێویستیان لە بارەی هەرێمی کوردستان و دەرفەتەکانی وەبەرهێنان دەست بکەوێت. 

هەمیشە ووتوومە کە، کەرتی گشتی و کەرتی تایبەت تەواوکەری یەکترن، ئەمەش تەنیا دروشمێک نیە، بەڵکو بڕوامان پێی هەیە و دەرک بە کاریگەری و گرنگیی بەشداریی کەرتی تایبەت لە پێشخستن و بووژاندنەوەی ئابووری ووڵاتدا دەکەین. 

ساڵانی ڕابردوو بارودۆخی سەختمان تێپەڕاند، کاریگەرییەکانی پەتای کۆرۆنا و ناسەقامگیریی بازاڕەکانی جیهان و کێشە سیاسی و داراییە ناوخۆیی و ناوچەییەکان، هەمووی کۆسپی گەورە بوون لە بەردەممان، بەڵام سوپاس بۆ خوای گەورە، بە خۆڕاگریی هاووڵاتییانی خۆشەویستمان و بە پلان و بەرنامەکانی کابینەکەمان و بە هاوکاریی ڕاستەوخۆی کەرتی تایبەتی کوردستان، توانیمان ئەو قۆناغە تێپەڕێنین. بۆیە لێرەدا دیسان بە دەرفەتی دەزانم کە سوپاسێکی تایبەتی کەرتی تایبەتی هەرێمی کوردستان بکەم، کە هەمیشە لە کاتی تەنگانە و قەیرانەکاندا، هەڵوێستیان هەبووە و بەشدار بوونە لە سووککردنی ئەرکی حکوومەت و هاوکاری هاووڵاتیانی خۆشەویستمان. 

بەرێزان....

ئێستاش کاتی ئەوە هاتووە کە بە پلان و بەرنامەیەکی تۆکمە بەرەو داهاتوویەکی گەشتر هەنگاو بنێین. بۆیەش هەموو هەوڵێک دەدەین تاکو وەبەرهێنەرانی کەرتی تایبەتی ناوخۆ و دەرەوە، متمانەی زیاتر بە بازاڕی هەرێمی کوردستان بکەن. ئێمە هەر زوو هەوڵمان داوە کە هەموو بەربەستە یاسایی و بیرۆکراسییەکان لە بەردەم پرۆسەی وەبەرهێنان هەڵگرین. کاری زۆر کراوە، بەڵام دەزانین کاری زۆرتریش ماوە بۆ ئەوەی ئاسانکاری زیاتر بۆ وەبەرهێنەران بکەین.

 ئێمە دەزانین کە وەبەرهێنان، پێویستی بە سیستەمێکی بانکی باوەرپێکراو و کارا هەیە، بۆیە لەم کابینەیەدا، هەوڵی چڕ و پڕمان دەست پێکردووە و چەند تیمێکی سەر بە ئۆفیسی خۆشم ڕاسپاردووە، کە بە هاوکاریی شارەزایانی ئەو بوارە، کار بکەن بۆ ئەوەی هەرێمی کوردستان لە بازاڕێکی پشت بەستوو بە پارەی کاش، بەرەو بازاڕێکی خاوەن سیستەمێکی بانکیی باوەڕپێکراو بگۆڕدرێت.

هەوڵمان داوە و بەردەوامین کە خزمەتگوزارییەکانی پەیوەندیدار بە وەبەرهێنان، لە تۆماری کۆمپانیاکان تا ڕێکارەکانی وەرگرتنی پرۆژەکان، بە ئەلکترۆنی بکرێن، هەوڵمان داوە کۆی پرۆسەکان خێراتر ببن و کاتێکی کەمتری کۆمپانیاکان بەهەدەر بدرێت. بێگومان هێشتاش گلەیی هەیە و پێویستە لەم بوارەدا، کاری زیاتر بکرێت و بە تایبەت لێرەدا قسەکانم ئاراستەی دامودەزگاکانی پەیوەندیدار دەکەم و پێیان دەڵێم کە هەرچی زووتر پرۆسەی دابینکردنی زەویی گونجاو و پێویست بۆ وەبەرهێنەران خێراتر و ڕێکتر بکەن.

هەرێمی کوردستان ناوچەیەکی سەقامگیر و ئارامی دەڤەرەکەیە و لە هەمانکاتدا سروشت و جوگرافیای هەرێم زۆر لەبارە بۆ وەبەرهێنان لە بوارەکانی کشتوکاڵ و گەشتیاری و پێشەسازی. ئێمە سیاسەتی ئابووری فرەچەشنمان گرتۆتە بەر، بۆیە بە هەموو توانایەک پشتگیری لە وەبەرهێنانی فرەچەشنیش دەکەین. ئێمە سامانی زۆرمان لەم وڵاتە هەیە. توانای مرۆیی گەورەترین سەرمایەمانە. بە وەبەرهێنان لەم بوارەدا دەتوانین داهاتوویەکی گەشتر بۆ ووڵاتەکەمان مسۆگەر بکەین. من ساڵی رابردوو لە بۆنەیەکدا ئەنستیتۆتی داهێنان و نوێگەری کوردستان (KII)م ڕاگەیاند بۆ ئەوەی توانا مرۆییەکانمان بدۆزینەوە و وەبەرهێنانیان لە سەر بکەین، بیرۆکە و داهێنانی خاوەن بەهرەکان دەکرێت ببێت بە هەوێنی پرۆژەی گەورە و وەبەرهێنەرانی ناوخۆ و دەرەوە دەتوانن سوودی لێ وەرگرن.

سەرمایە و سامانێکی دیکەی گەورەی وڵاتەکەمان سروشتی جوان و ڕەنگینمانە، کەش وهەوایەکی لەبار و چوار وەرزمان هەیە، ئاو و زەویی بە پیتمان هەیە، بۆیە کشتوکاڵ و پیشەسازیی خۆراک، دەرفەتی زێڕینە بۆ وەبەرهێنەران لە کوردستان. 

هەروەها ئەو سروشتە دڵرفێنەمان دەکرێت ببێت بە باشترین دەرفەت بۆ وەبەرهێنەرانی بواری گەشتوگوزار لە هەموو ڕۆژهەلاتی ناوەراستدا.

بەرێزان....

ئێمە لەگەل پێشکەوتنی هەموو ناوچەکە و عێراقین، لەو بڕوایەداین گەر هەرێمی کوردستان پێشبکەوێت و گەشە بکات، لە قازانجی هەموو عێراقدایە. ئێمە دەمانەوێت هەرێمی کوردستان ببێت بە دەروازە و دەستپێکی کاری زۆر کۆمپانیا، تاکو لێرەوە بەرەو ناوچەکانی دیکەی عێراقیش پەلبکێشن. لە ساڵانی رابردوودا سەرمایە و داهاتی عێراق بە باشی بەکارنەهێنراوە و بە تایبەتیش لە بەشی هەرێمی کوردستان، ستەم لە هاووڵاتیانمان کراوە، ئێستا دەرفەتێکی نوێ هاتووەتە ئاراوە و هیوادارین یاسای بودجەی عیراق بە شێوەیەکی دادپەروەرانە و دوور لەدەستێوەردانی سیاسی جێبەجێ بکرێت. تێگەیشتنی باشم لەگەل بەرێز محەمەد شیاع سوودانی سەرۆک وەزیرانی عێراق هەیە و بە پاڵپشتیی هەموو لایەک، پێویستە ڕووبەڕووی ئاستەنگە سیاسی و ئابوورییەکان ببینەوە و پێکەوە دەتوانین عێراق بگەیەنێن بە ڕیزی وڵاتانی پێشکەوتووی جیهان، چوونکە کۆی عێراق لە هەموو ڕوویەکەوە دەوڵەمەندە و تەنیا بەڕێوەبردنێکی باشی پێویستە.

بەرێزان ....

دەستەی وەبەرهێنان لە هەرێمی کوردستان، زیاتر لە هەزار دەرفەتی وەبەرهێنانی لە بوارە جۆراوجۆرەکان ڕاگەیاندووە و ئێستا ئێمە وەک حکوومەتی هەرێم بەرچاومان ڕوونە و دەزانین چیمان دەوێت تاکو هەم هەرێمەکەمان پێشکەوێت، هەم وەبەرهێنەران سوود بکەن و هەم هاووڵاتیانیشمان دەرفەتی کاری زیاتریان بۆ برەخسێت و ئابورریی کوردستان ببووژێتەوە.

خۆشم پلانم هەیە کە لە نزیکەوە، زیاتر لە جاران وەبەرهێنەرانی ناوخۆ و تەنانەت دەرەوەش ببینم، بۆ ئەوەی بە تێبینی و پێشنیارەکانیان، بەرچاومان ڕوونتر ببێت و هیوادارم کە ڕۆژ بە ڕۆژ شایەدی بەشداریی زیاتری وەبەرهێنەرانمان لە بوارە جیاجیاکان بین.

با هەموومان پێکەوە هاوکار بین تاکو کوردستانێکی ئاوەدانتر و گەشتر و بەهێزترمان هەبێت.