پەیامی کورد      ...   ووردەکاری گرینگ سەبارەت بە تاپۆکردنی زەوی و خانوە زێدەڕۆکان بڵاو دەکەینەوە

پەرلەمانی کوردستان لەکۆبوونەوەی ئەمڕۆ سێشەممەیدا بەزۆرینەی دەنگی ٦٤ پەرلەمانتاری ئامادەبوو، دەنگیدا لەسەر ھەمواری یاسای بەخاوەنکردنی ئەو زەوییانەی لە سنووری شارەوانییەکان زێدەڕۆییان لەسەر کراوە.

لوقمان وەردی، سەرۆکی لیژنەی شارەوانییەکان لە پەرلەمانی کوردستان رایگەیاند، ئەمڕۆ سێشەممە پەرلەمانی کوردستان بەزۆرینەی دەنگی ٦٤ پەرلەمانتار، (هەمواری یەكەمی یاسای ژمارە (٣)ی ساڵی ٢٠١٩، یاسای بەخاوەنكردنی ئەو زەوییانەی كە لەسنووری شارەوانییەكان زێدەڕۆییان لەسەر كراوە لەهەرێمی كوردستان-عێراق) پەسەندکرد.

ئاماژەی بەوەشکرد، یاساکە ژمارەیەک گۆڕانکاری تێداکراوە لەوانەش نرخی تاپۆکردنی زەوی و خانوەکان کەم کرایەوە، بەجۆرێک نرخی تاپۆکردنەکە نابێت لە ٥%ی نرخی راستەقینەی زەوی و خانوەکان زیاتر بێت، گرینگییەکی دیکەی یاساکەش ئەوەیە دەبێتە هۆی راستکردنەوەی نەخشەی شارەکان و رێکخستنەوەی ئەو گەڕەکانەی بەزیادەڕۆیی درووستبوون و گونجاندنیان لەگەڵ نەخشە و ماستەر پلانی شارەکان.

بەگوێرەی هەمواری یاسای  تاپۆکردنی زەوی و خانوە زێدەڕۆکان هاووڵاتیان ماوەی ساڵێکیان پێدەدرێت بۆ ئەوەی داواکاری تاپۆکردنی خانوەکانیان پێشکەش بکەن، ماوەی جێبەجێکردنی یاساکەش سێ ساڵە، هەروەها یاساکە حکوومەت پابەند دەکات هەمو ئەو شار و شارۆچکانەی ماستەرپلانیان نیە، شارەوانییەکان نەخشە و ماستەرپلانیان بۆ دابنێت.

لەهەموارەکەدا هاتووە، ئەو ناوچانەی خانوی زێدەڕۆیان لەسەر درووستکراوە و لەلایەن شارەوانییەوە جیانەکراونەتەوە بە  ٥%ی نرخی راستەقینەی زەوییەکە تاپۆ دەکرێن، هەروەها ئەگەر زەوییەک پێشووتر لەلایەن شارەوانییەوە جیاکرابێتەوە و زیادەڕۆیی کرابێتەسەر ئەو زەوییە بەنرخێک لەسەر خاوەنەکەی تاپۆ دەکرێت کە ٢٥%ی نرخی راستەقینەی زەوییەکە تێپەڕنەکات و ئەو کەسەش بەسوودمەند هەژمار دەکرێت.

لوقمان وەردی لەبارەی ئەو زەویانەش کەلەناوچە سنوورییەکان یان ناوچە زیان بەرکەوتوەکان زیادەڕۆییان کراوەتەسەر وتی، ئەو ناوچانەی لەسەردەمی رژێمی بەعس بەهۆکاری سیاسی دوچاری وێرانبوون هاتوون و دوای راپەڕین ئاوەدانکراونەتەوە خانوەکانیان بە  ٢%ی نرخی راستەقینەی زەوییەکان لەسەر تاپۆ دەکرێت.

لەهەموارەکەدا ئاماژە بەوەشکراوە ئەو کەسانەی تا ٣١-١٢-٢٠٢٠ خانووی زیادەڕۆیان درووستکردوە، دەتوانن سوود لەحوکمەکانی ئەم یاسایە وەربگرن.

ئەم بابەتە 11993 جار خوێندراوەتەوە