پەیامی کورد      ...     ئێران گرووپێک بە ناوی حەشدى شیعی لە ئەفغانستان دادەمەزرێنێت

ئەمریکا بە بەجێهێشتنى ئەفغانستان، ڕێگاى بۆ ڕمبازێنى کۆمارى ئیسلامى و پشتیوانیکردنى گرووپە تیرۆریستییەکان خۆشتر کرد. کۆمارى ئیسلامى بە پشتیوانى ئەلقاعیدە و تاڵیبان نەوەستاوەتەوە، بەڵکوو ئێستا بە ئاشکرا گرووپێکى دیکەى درووست کرد بۆ شیعەکانى ئەفغانستان. ئەو گرووپە ناوى "الحشد الشیعی"ـیە.

 دامەزراندنى ئەم گرووپەش لە دواى ئەوە هات کە سەرۆکى ئەفغانستان دژى تاڵیبان کە خەریکى کۆنتڕۆڵکردنەوەى بەشێکى زۆرى ئەو ووڵاتەیە، داواى چەک هەڵگرتنى لە خەڵکى خۆبەخش کرد.

کۆمارى ئیسلامیش ئەم هەلەى قۆزییەوە و حەشدى شیعەى دامەزراند کە درێژکراوەى حەشدى شەعبی عێراقە. زۆرینەى ئەندامەکانى ئەم گرووپە لە سووریا و عێراق لەگەڵ سوپاى پاسداران چالاکییان هەبووە.

ڕۆژنامەی "جمهوری ئیسلامی"، دوێنێ بە مانشێتى گەورە هەواڵى درووستبوونى ئەم گرووپەى ڕاگەیاند و لە ناوخانى هەواڵەکەشیدا باسى لەوە کردووە کە "ئەم گرووپە پێشتر هاوکار و پارێزەرى حەرەمە پیرۆزەکان بووە و زیاتر لە حەوت ساڵە شانبەشانى سوپاى پاسداران لە سووریا دژ بە داعش و لەگەڵ سووریا شەڕ دەکەن".

حەسەن حەیدەری، فەرماندەى حەشدى شیعى باسى لەوە کردوە کە ئامادەن لەگەڵ ئەشرەف غەنى سەرۆکى ئەفغانستان دژى تاڵیبان بوەستنەوە و ئەگەرى هەیە هێزەکانى تریان کە مەبەستى فاتمی یوونە (شیعە شەڕکەرەکانى ئەفغانى لە سووریا)، هاوکار و پاڵپشتیان بن.

ئێستا ئەفغانستان بەدەر لە مەترسییەکانى تاڵیبان دەکەوێتە بن مەترسى گرووپێکى گەورە و تیرۆریستى دیکەوە کە ئەویش حەشدى شیعییە و هاوشێوەى حەشدى شەعبی لە عێراق دەبێتە لەمپەر لە سەروەرى یاسایی و سیاسى ووڵاتەکە و دەبێتە ئامرازێک بۆ بەدیهێنان و جێبەجێکردنى پیلانە شەڕەنگێزییەکانى کۆمارى ئیسلامى.

کۆمارى ئیسلامى بەردەوام هەلى چۆڵکردن و بەجێهێشتنى ووڵاتە داگیرکراوەکانى قۆزتووەتەوە کە ئەمریکا بەجێیان دەهێڵێت و بە درووستکردنى هێزى چەکدارى شیعى بنەمایەک بۆ بەهێزبوون و پاراستن و هێشتنەوەى خۆى دادەنێت.

ئەم بابەتە 11988 جار خوێندراوەتەوە