پەیامی کورد      ...  وەزارەتی دەرەوەی ئەمریکا پشتیوانی خۆی بۆ خەڵكی ئەهواز ڕاگەیاند

"نێد پرایس" ووتەبێژی میدیایی وەزارەتی دەرەوەی ئەمریکا ڕایگەیاندووە؛ ئێمە پشتیوانی لە مافی خەڵکی ئێران و لە خۆپیشاندانەکانیان دەکەین.

"پرایس" جەختی کردووەتەوە کە خەڵکی ئێران وەک باقی خەڵکی جیهان دەبێ بێ ترس و تووندووتیژی بەرانبەریان خۆپیشاندان بەڕێوە ببەن.

ڕێکەوتی ٢٤ی پووشپەڕ، خەڵکی پارێزگای خوزستان، بە نیشانەی دەربڕینی ناڕەزایەتی بەرامبەر نەبوونی بەڕێوەبەری باش و پچڕانی بەردەوامی ئاو ڕژانە سەر شەقامەکان و خۆپیشاندانیان بەڕێوە برد.

هەتا ئێستاش خۆپیشاندانەکان درێژەی هەیە و خەڵک لەسەر شەقامەکانن.

لەو خۆپیشاندانانەدا خەڵکی عەرەبی ژێر دەسەڵاتی ڕێژیمی ئێران، کە زۆربەیان منداڵ بوون و داوای ئاوی خواردنەوەیان دەکرد نەک بە هانایانەوە نەهاتن بەڵکوو بە گولـلە لەلایەن هێزە نیزامییەکانەوە ووڵامیان دراویەوە.

پێشتر "غوڵامڕەزا شەریعەتی"، پارێزگاری پارێزگای ئەحواز لە پەیوەندی بە ئاوی خاوێن وتبووی: "لە هیچ شوێنێکی پڕ ئاو و کەم ئاوی پارێزگای خوزستان، ئاوی خواردنەوە و ئاوی خاوێن بوونی نییە و ئاماژەی بە ٧٣٠ گوند لە خوزستان کرد کە لە ئاوی خواردنەوە بێبەشن".

ئەم بابەتە 11990 جار خوێندراوەتەوە