وەزیری تەندرووستی سەبارەت بە دابەشکردنی واکسەن پەیامێک بڵاو دەکاتەوە
پەیامی کورد ... وەزیری تەندرووستی سەبارەت بە دابەشکردنی واکسەن پەیامێک بڵاو دەکاتەوە
ژمارەیەکی بەرچاوی ڤاکسین گەیشتوونەتە ھەرێمی کوردستان و وەزیری تەندرووستیش دەڵێ، پڕۆسەی دابەشکردنی ڤاکسین خێراتر دەکرێت و، بڕیارە سەد ھەزار ڤاکسین لە لایەن ووڵاتی چینەوە پێشکەش بە ھەرێمی کوردستان بکرێت.
د. سامان بەرزنجی، لە کۆنگرەیەکی رۆژنامەوانیدا رایگەیاند: "شەوی رابردوو ژمارەیەکی زۆری ڤاکسینی کۆرۆنا گەیشتووەتە ھەرێمی کوردستان، بڕیارە ١٠٠ ھەزار ڤاکسینی جۆری سینۆفارم لە لایەن حکوومەتی چینەوە پێشکەش بە ھەرێمی کوردستان دەکرێت، ھاتنی جۆرەکانی دیکەی فایزەر و ئەسترازینکاش بەردەوام دەگاتە ھەرێمی کوردستان،
لە لایەن رێکخراوی تەندرووستی جیھانیەوە، رێژە و ژمارەی ڤاکسینەکان بۆ وەزارەتی تەندرووستی رەوانەکراون لەگەڵ خشتەی دابەشکردنیشی لەگەڵدایە، بەردەوامیش ڤاکسین دەگاتە ھەرێمی کوردستان".
د. سامان بەرزنجی ئاماژەی بۆ ئەوەکرد: "پڕۆسەی ڤاکسین خێراتر و فراوانتر دەکرێت، بنکەکانی دابەشکردنی ڤاکسینی کۆرۆناش زیاتر دەکرێن، ئەوەش جێگەی ئومێدە، بەڵام پێویستە لەگەڵ دابەشکردنی ڤاکسین، رێنماییەکانی خۆپارێزی جێبەجێ بکرێن لەلایەن ھاووڵاتییانەوە، چونکە بەکارھێنانی ڤاکسین تەنیا چارەسەر نییە بۆ بەرەنگاربوونەوەی کۆرۆنا".
ئەم بابەتە 11991 جار خوێندراوەتەوە