پەیامی کورد   ...   وەزیری تەندرووستی سەعوودیە ڕەتیدەکاتەوە نەخۆشی لە ووڵاتەکەدا بڵاوبێتەوە

وەزیری تەندرووستی سەعوودیە ڕایگەیاند، تا ئێستا هیچ حاڵەتێکی پەتا لە ووڵاتەکەدا دەستنیشان نەکراوە، ئامادەیی تەواوی ووڵاتەکەی بۆ میوانداریکردنی ملیۆنان حاجی بۆ حەجی ئەمساڵ ڕاگەیاند.

بەگوێرەی ڕاپۆرتێک ، فەهد جەلاجل، وەزیری تەندرووستی سەعوودیە پشتڕاستی کردەوە کە تا ئێستا هیچ حاڵەتێکی نەخۆشی پەتایی تۆمار نەکراوە و مەترسی بڵاوبوونەوەی نەخۆشی نییە کە هەڕەشە لە حاجیانی حەج بکات.

لە بەیاننامەیەکی فەرمی دا کە ئەلعەرەبیە ئینگلیز هاوبەشی کردووە، وەزیری تەندرووستی سەعوودیە ڕایگەیاند: بە خۆشحاڵییەوە ڕایدەگەێنین کە تا ئێستا هیچ حاڵەتێکی نەخۆشی پەتایی دەستنیشان نەکراوە و مەترسی بڵاوبوونەوەی نەخۆشی نییە، تەندرووستی و سەلامەتی زیارەتکاران هەر لە پێشینەی کارەکانی ئێمەدایە.

وەزیری تەندرووستی سەعوودیە هەروەها جەختی لە ئامادەکاری بەرفراوانی ووڵاتەکەی بۆ درووستکردنی ئەزموونێکی سەلامەتی حەج کردەوە و ئاماژەی بەوەشکرد: وەزارەتەکە بەردەوامە لە چاودێریکردنی وردی دۆخی تەندروستی گشتی.

بەگوێرەی ڕاپۆرتەکە کە لە میدیاکانی سەر بە سەعوودیە بڵاوکراوەتەوە، سەعوودیە چەند مانگێک پێش دەستپێکردنی زیارەتەکەی ساڵانە دەستی بە ئامادەکارییەکانی کردووە بۆ زیارەتەکەی ساڵانە، کە پێشبینی دەکرێت زیاتر لە دوو ملیۆن حاجیان بۆ خۆی ڕابکێشێت. لە ناو ئەو ڕێوشوێنانەی کە گیراونەتەبەر، هەڵسەنگاندنی مەترسی جیهانی بۆ نەخۆشییەکانی وەک تای زەرد، ئیفلیجی منداڵان و هەوکردنی پەردەی مێشک هەبووە.

لە چوارچێوەی ئەم هەوڵانەدا، سەعوودیە سنووردارکردنی تووندی تەندرووستی بۆ چوونە ناو ووڵاتەکە سەپاندووە و پێوەرە نوێیەکانی "لەش جوانی تەندرووستی"ی جێبەجێکردووە بۆ دڵنیابوون لەوەی کە حاجییەکان لە ڕووی جەستەیی یەوە لەش جوانین بۆ ئەنجامدانی ڕێوڕەسمەکان.

لەم دوایی یانەدا ڕۆژنامەی تەلەگراف باسی لە بەرزبوونەوەی حاڵەتەکانی ڤایرۆسی کۆڕۆنای ڕۆژهەڵاتی ناوەڕاستی هەناسەدان (MERS-CoV) لە سەعوودیە بڵاوکردەوە و نیگەرانییەکانی لە ئەگەری بڵاوبوونەوەی نەخۆشییەکە لە کاتی گەشتی حەج دا درووستکرد، کە پێشبینی دەکرێت نزیکەی سێ ملیۆن کەس بگەێنێتە مەککە. ڕاپۆرتەکە ئاماژەی بە وەزارەتی تەندرووستی سەعوودیە کردووە، کە لە مانگی ئادارەوە 9 حاڵەتی تووشبوون بە ڤایرۆسی کۆرۆنا و دوو حاڵەتی گیان لەدەستدانیان تۆمارکردووە.

بە ووتەی بەرپرسانی سەعوودیە، زیاتر لە یەک ملیۆن حاجی بیانی بۆ بەشداریکردن لە حەجی ئەمساڵ گەیشتوونەتە سەعوودیە.

وەزیری تەندرووستی سەعوودیە هەروەها ڕایگەیاند، تا ئێستا زیاتر لە 50 هەزار خزمەتگوزاری پزیشکی پێشکەش کراوە کە 140 نەشتەرگەری و 65 ئەنجیۆگرافی دڵ و 6 نەشتەرگەری دڵ کراوەن.

هەروەها لە ڕێکارێکی خۆپارێزی بۆ بەرەنگاربوونەوەی گەرمای زۆر، کۆمیسیۆنی شاهانەی مەککە و شوێنەکانی زیارەت زیاتر لە ١٠ هەزار نەمامیان چاندووە و ڕێڕەوی سێبەریان پەرەپێداوە و ٤٠٠ وێستگەی ئاو و تەم و مژیان داناوە.