وەزیری ناوخۆی هەرێمی کوردستان : هەر کەسێك مووچەخۆری حکوومەت بێت ناتوانێت لە کۆمپانیا ئەمنییەکان کار بکات
پەیامی کورد ... وەزیری ناوخۆی هەرێمی کوردستان : هەر کەسێك مووچەخۆری حکوومەت بێت ناتوانێت لە کۆمپانیا ئەمنییەکان کار بکات
وه‌زیری ناوخۆی حکوومەتی هه‌رێمی كوردستان رایگەیاند، پڕۆژه یاسایه‌ك بۆ رێكخستنی كاری كۆمپانیا ئه‌منییه‌كان ئاماده‌كراوه و دوای ده‌رچوونی ئه‌و یاسایه له په‌رله‌مان كاروباری كۆمپانیا ئه‌منییه‌كان به یاسا رێكده‌خرێن، دەشڵێت، "كامێرای چاودێری نادرێته كه‌رتی تایبه‌ت".
رێبه‌ر ئه‌حمه‌د، وه‌زیری ناوخۆی هه‌رێمی كوردستان ئەمڕۆ دووشەممە لەمیانی کۆنگرەیەکی رۆژنامەوانیدا رایگەیاند، "به‌داخه‌وه بارودۆخی كۆڕۆنا رووی له خراپ بوونه و رۆژانه زیاتر له ٢٣٠٠ كه‌س تووشی كۆڕۆنا ده‌بن، به‌ڵام له لیژنه‌ی باڵای رووبه‌ڕووبوونه‌وه‌ی ڤایرۆسی كۆڕۆنا به په‌سندمان نه‌زانی رێكاره‌كان تووند بكه‌ین، به جۆرێك كاریگه‌ری له‌سه‌ر ژیانی خه‌ڵك درووست بكات ته‌نها ئه‌وه نه‌بێت داوامان له هاووڵاتیانه پابه‌ندی رێنماییەیكانی خۆپاڕیزی بن".
ئاماژەی بەوەشکرد، چاوه‌ڕێی هه‌ڵسه‌نگاندنی وه‌زاره‌تی ته‌ندرووستی و ڕێكخراوی ته‌ندرووستی جیهانی ده‌كه‌ن ئه‌گه‌ر هه‌ڵسه‌نگاندنه‌كه دڵخۆشكه‌ر نه‌بن ناچار ده‌ین رێكاری تووندتر بگرنه‌به‌ر.
لەبارەی کامێراکانی چاودێری، رێبەر ئەحمەد ووتی، "كاری كۆمپانیا ئه‌منیه‌كان به یاسا رێك ده‌خرێت، بۆ ئه‌م مه‌به‌سته‌ش پرۆژه یاسایه‌ك له ئه‌نجوومه‌نی وه‌زیران ئاماده‌كراوه و ئاڕاسته‌ی په‌رله‌مانی كوردستان كراوه، دوای ده‌رچوونی ئه‌و یاسایه كۆمپانیا ئه‌منییه‌كان كه ژماره‌یان زیاتر له ٦٧ كۆمپانیایه كاروباره‌كانیان له ژێر چاودێری وه‌زاره‌تی ناوخۆدا ده‌بێت".
وەزیری ناوخۆ باسی لەوەشکردوە، ئەو پڕۆژە یاسایە هەلی کاری زۆر بۆ گەنجان دەرەخسینێت، هەر کەسێك مووچەخۆری حکوومەت بێت ناتوانێت لە کۆمپانیا ئەمنییەکان کار بکات.
ئەم بابەتە 11990 جار خوێندراوەتەوە