وەزیری کارەبای حکوومەتی ھەرێمی کوردستان ووتی، پێدانی کارەبا بە کەرتی تایبەت سوودی زۆرە بۆ ھاووڵاتییان و کاتژمێرەکانی کارەبا زیاد دەکات و سەرکەوتنی کەرتی تایبەتیش لە پێوەری زیرەکە کە ئێستا گرێ دەدرێت، بۆیە ھەموو ھەوڵەکان بەو ئاڕاستەیەن بۆ ئەوەی دۆخی کارەبا باش بێت و کاتژمێرەکانی کارەبا زیاتر بن، چوونکە سەرۆکی حکوومەتی ھەرێمی کوردستان زۆر ھاوکارە بۆ ئەوەی دۆخی کارەبا باشتر بێت.

کەمال موحەمەد، وەزیری کارەبای حکوومەتی ھەرێمی کوردستان، ڕایگەیاند : "لە ٤/٥ پڕۆژەی پێدانی کارەبا بە کەرتی تایبەت دراوە بە ئەنجوومەنی وەزیران و ھەر ژمارەیەک بگوترێت ڕەنگە دروست نەبێت و نامانەوێت شتی ناڕاست بڵاو بکرێتەوە و لە ئەنجومەنی وەزیران تیمێکی ڕاوێژکاری کاری لەسەر دەکات و ئێستا ئەوان زیاتر پێوەی گرێ دراون، بەڵام بڕیار دراوە کە بدرێتە کەرتی تایبەت، ئەمەش لەبەر ئەوەی بابەتێکی ھەستیارە و ساڵێک و دوو مانگە ئەو پڕۆژەیە کاری لەسەر دەکرێت.''

کەمال موحەمەد ووتیشی: "سوودەکانی پێدانی کارەبا بە کەرتی تایبەت ئەوەیە کە ئەو کارەبایەی ون دەبێت دەگەڕێتەوە و بۆ ھاووڵاتییان دەبێت، ئەمەش کاتژمێری کارەبا زیاد دەکات و کاتژمێرەکانی مووەلیدەش کەم دەبێتەوە و چەندین کارمەندی ئێمە کە ٧٠%ی لەگەڵ ئەوان کار دەکەن مووچەکەیان کەرتی تایبەت دەیدات، بۆیە لە قازانجی ھەمووانە و گرینگ ئەوەیە لە خزمەت ھاووڵاتییاندایە.''

کەمال موحەمەد باسی لەوەش کرد: "سەرکەوتنی پێدانی کارەبا بە کەرتی تایبەت لە پێوەری زیرەکدایە، چوونکە لە شوێنێکی وامان داناوە ئاسان نەبێت زیادەڕۆیی لەسەر بکرێت و پێشتر لە بۆردی ماڵان سەرپێچی دەکرا و ئێستا زەحمەتە سەرپێچی بکرێت، بۆیە سەرکەوتنی کەرتی تایبەت لە پێوەری زیرەکە و تا پێنج شەممەی ڕابردوو ٨٢٧ ھەزار پێوەر گرێ دراوە و خۆی یەک ملیۆن و٥٠٠ ھەزارە و ڕەنگە تا مانگی دوو تەواو بێت.''

ووتیشی: "لە ١٥/٦ دۆخی کارەبا ھەندێک تێک چوو لەبەر ئەوەی کۆمپانیا پێنج وەحدەی ڕاگرت و باسیان لەوە کرد پێویستیان بە سییانە ھەیە و دوای ئەوەی ئەو کارە کرا، سەرۆکی حکوومەت ٤٠ ملیۆن دۆلاری بۆ خەرج کردن، لە ئەنجامدا ٢ وەحدە گەڕانەوە و ئەمڕۆ سێیەم دەگەڕێتەوە و دۆخی کارەبا باشتر دەبێت، ئەمەش بە ھەوڵی سەرۆکی حکوومەت ووەزارەتی کارەبایە.''

وەزیری کارەبای حکوومەتی ھەرێمی کوردستان ڕوونیشی کردەوە، ئێستا ڕۆژانە ١٦ کاتژمێر کارەبا دەدرێت و پلان ھەیە زیاتر بکرێت و ھەر ئەمڕۆ کاتژمێرێک زیاتر دەبێت.''