وەزیری کارەبای هەرێمی کوردستان پەیامێکی زۆر گرینگ سەبارەت بە بڕینی کارەبا بڵاو دەکاتەوە
پەیامی کورد ... وەزیری کارەبای هەرێمی کوردستان پەیامێکی زۆر گرینگ سەبارەت بە بڕینی کارەبا بڵاو دەکاتەوە
کەمال موحەمەد، وەزیری کارەبای هه‌رێم ی کوردستان ڕایگەیاند ، بەپێی یاساو رێنمایی، هەر هاوبەشێکی کارەبا ، ئەگەر دوو جار بەسەر یەکەوە کرێی کارەبا نەدات، کارەباکەی دەبرێت، "بەڵام ئێمە دۆخی هاووڵاتیانمان لەبەرچاو گرتووەو کارەبای کەسمان نەبڕیوە."
به‌پێی هه‌واڵی وه‌زاره‌تی كاره‌با، کەمال موحەمەد ڕایگه‌یاندووه، "بە پێی یاسا و رێنمایی، هەر هاوبەشێکی کارەبا ئەگەر دوو جار بە سەر یەکەوە کرێی کارەبا نەدات، کارەباکە دەبرێت، بەڵام ئێمە دۆخی هاووڵاتیانمان لە بەرچاو گرتووە و کارەبای کەسمان نەبڕیوە." ووتیشی، "لەماوەی نۆ مانگدا، بە بڕیاری ئەنجوومەنی وەزیران لە %١٥ی لێخۆشبوون بۆ قەرزی کرێی کارەبا هەبوو. ئێستا قەرزی هاوبەشانی کارەبا دەکەینە ١٢ قیست، کە دەتوانن مانگانە لەگەڵ کرێی کارەباکەیان بدەن."
له‌باره‌ی دۆخی كاره‌باوه ناوبراو ئاماژه بۆ ئه‌وه ده‌كات كه چەند رۆژێکە رەوشی کارەبا باشتر بووە، ئەوەش پەیوەندی بەگەڕانەوەی دوو یەکەی کۆمپانیای ماس هەیە کە لە رۆژی ١٥ ی حوزەیران، پێنج یەکەی کۆمپانیاکە بەهۆی چاکسازی لە کار کەوتن و دواتر بە بڕیاری سەرۆکی حکوومەت ٤٠ ملیۆن دۆلار وەک حەقدەست بۆی تەرخان کرا و دوو یەکەی بەکار خراوە. ئێستا بە شێوەیەکی مامناوەندی رۆژانە ١٥-١٦ کاتژمێر کارەبا لە سەرانسەری ھەرێم دەدرێت.
وه‌زاره‌تی كاره‌با ده‌ڵێت، "لە شەش مانگی کۆتایی ٢٠١٩، شەش مانگی یەکەمی کابینەی نۆیەم ٦ هەزار سەرپێچی لابراون، لە ساڵی ٢٠٢٠ گەیشتە ١٠ هەزار سەرپێچی و لە ماوەی ٧ مانگی ئەمساڵیش ٥ هەزار سەرپێچی لابراون، کە دەکاتە ٢١ هەزار سەرپێچی. بۆ نە‌هێشتنی سەرپێچییەکان و پێدانی کارەبا لە رێگەی پێوەری زیرەکەوە بە هەندێ شوێنی وەک (بازرگانی، ماڵ و پێشەسازی) لیژنەیەک بە ئەندامەتی هەر چوار وەزارەتی ( کارەبا، داد، شارەوانی و گەشتوگوزار و کشتوکاڵ و سەرچاوەکانی ئاو) پێکهات، پێدانی کارەبا بەم شوێنانە بەم مانایە نییە کە رەواتی بدات بەوەی کە بە یاسایی دروست کراون، بەلکوو تەنیا بۆ خەملاندنی کارەباکەی بووە."
کەمال موحەمەد ئه‌وه‌شی وتووه، "تا ئێستا ٨٠٠ هەزار پێوەری زیرەک لە سەرانسەری هەرێمی کوردستان بەستراون. بەر لەپرۆژەی پێوەری زیرەک بە فیڕۆچوونی کارەبا لە%٤٤ بوو، ئێستا بۆ %٣٦ نزم بووەتەوە. لە %١٢ بە فیڕۆچوونی کارەبا بابەتێکی تەکنیکییە و لە تەواوی جیهاندا هەیە. بە هۆی پێوەری زیرەکەوە، لە ٧ مانگی ٢٠٢١ لە بەروارد لەگەڵ ٧ مانگی ٢٠١٩، بە رێژەی ٣.١٢ کاتژمێر کارەبامان زیاتر داوە."
ئەم بابەتە 11986 جار خوێندراوەتەوە