پەیامی کورد     ...     پارتی  : سەرەڕای دابەزینی نرخی بەنزین کوالێتی یەکەشی باشتر دەکرێت

بڕیارە ئاسانکاری بۆ ھاوردەکرنی بەنزین بکرێت و پەرلەمانتارێکی فراکسیۆنی پارتیش دەڵێ، لەچەند رۆژی داھاتوو نرخی بەنزین لەھەرێمی کوردستان دادەبەزێت و بەھۆی کەم کردنەوەی باج کۆمپانیاکان ناچار دەکرێن نرخی بەنزین دابەزێنن.

د. رێبوار بابکەیی پەرلەمانتاری فراکسیۆنی پارتی لەپەرلەمانی کوردستان، رایگەیاند، "لەماوەکانی رابردوو بەدوداچوونی زۆرمان بۆ نرخی بەنزین لەھەرێمی کوردستان کرد و دواتر پەیوەندیمان بە وەزیری سامانە سرووشتیەکانەوە کرد و چەند پێشنیازێکمان بۆ دابەزاندنی نرخی بەنزین کرد، بڕیارە لەچەند رۆژی داھاتوودا نرخی بەنزین دابەزێت و کوالێتی بەنزین باشتر دەکرێت.

پەرلەمانتارەکەی پارتی ووتیشی، "وەزارەتی سامانە سرووشتیەکان لەپێناو بەرژەوەندی گشتی و دابەزاندنی نرخی بەنزین، باج لەسەر کۆمپانیاکانی ھاوردەکردنی بەنزین کەم دەکاتەوە  لەبەرامبەریشدا کۆمپانیاکان ناچار دەکرێن نرخی بەنزین دابەزێنن.

بابکەیی دەشڵێت، " ئەو بەنزینەی لەدەرەوە ھاوردەی ھەرێمی کوردستان دەکرێت، پێویستە کوالێتی بەرزبێت و بەپێی ستانداردبێت، بەپێچەوانەوە رێگە بە ھاوردەکردنی بەنزینی کواڵێت نزم نادرێت، چونکە بەپێی مەرجەکان پێویستە بەنزینی ھاوردەکراو لە کۆنتڕۆڵ دەربچێت و پشکنینی ھونەریشی بۆدەکرێت.

ئەم بابەتە 11985 جار خوێندراوەتەوە