پۆمپێئۆ: لەگەڵ مێشکی مرۆڤی ووشیاردا ناگونجێ کە دەوڵەتی بایدن بۆ بووژانەوەی بەرجام هەوڵ بدات
پەیامی کورد ... پۆمپێئۆ: لەگەڵ مێشکی مرۆڤی ووشیاردا ناگونجێ کە دەوڵەتی بایدن بۆ بووژانەوەی بەرجام هەوڵ بدات.
مایک پۆمپێئۆ، وەزیری دەرەوەی دەوڵەتی ترامپ، بە “جاروزالم پۆست”ی وتووە: بە وەبیرهێنانەوەی ئەوەی کە کۆماری ئیسلامی تەنیا لە ماوەی چەند مانگ‌دا توانی خۆی لە دەست بەربەستەکانی ڕێکەوتنی ئەتۆمی ناسراو بە “بەرجام”دەرباز بکا، لەگەڵ مێشکی مرۆڤی ووشیاردا ناگونجێ کە دەوڵەتی بایدن بۆ بووژانەوەی بەرجام هەوڵ بدات .
پۆمپێئۆ ووتی: “کۆماری ئیسلامی هەر لە سەرتاوە بەو بەڵێنانەی کە سەبارەت بە دام و دەزگا شاراوەکانی پیتاندنی ئۆرانیۆمی خۆی دابووی پێبەند نەبووە. بەڵگەنامە نهێنییەکانی ئەتۆمی ئێران کە رێکخراوی هەواڵگری مووساد، بڵاوی کردۆتەوە بە ڕاشکاوی نیشان دەدات کە کۆماری ئیسلامی هەر لە سەرەتاوە لە بواری سەربازی و چەکداری پڕۆگرامی ئەتۆمی خۆی درۆی کردووە”.
پۆمپێئۆ جەختی لەسەر ئەوە کردووە کە کۆماری ئیسلامی هیچکات لە هەوڵەکانی خۆی بۆ بەدەستهێنانی چەکی ئەتۆمی دەستی نەکێشاوەتەوە و ووتی بە پێچەوانەی لێدوانەکانی باراک ئۆباما،سەرۆک کۆماری پێشووتری ئەمریکا، کە دەیگوت: “دێوەزمەی ئەتۆمی کۆماری ئیسلامیمان لە شووشە کردووە”، بەرنامەی “ئاماد”ی سوپای پاسداران بۆ درووستکردنی چەکی ئەتۆمی بە بەراورد لەگەڵ ڕابردوو زیاتری کردووە.
وەزیری دەرەوەی پێشووی ئەمریکا هۆشداری‌دا کە حکوومەتی ئێران لە تەواوی ئامرازەکانی بەر دەستی خۆی کەڵکی وەرگرتووە تا ساتی تاقیکردنەوەی بەرنامەی ئەتۆمی خۆی تەنانەت ئەگەر بکرێت بۆ چرکەیەک زووتر بخاتە پێشەوە کە ئەمە زۆر سامناکە، هەر بۆیە مێشکی وشیار دەڵێ کە ئێمە نابێ بە ملیارد دۆلار پارە بخەینە بەر دەستی ئەوان کە بۆ پەرەدان بە بەرنامەی ئەتۆمی خۆیان کەڵکی لێ وەرگرن.
لەدرێژەی وتووێژەکەدا پۆمپێئۆ سەبارەت بە گرینگی لە ناوبردنی قاسم سلێمانی، فەرماندەی پێشووی هێزی قودسی سپای پاسدارانی کۆماری ئیسلامی، لە دەورەی دەوڵەتی ترامپیش‌دا شرۆڤە و لێدوانی کرد. پۆمپێئۆ لەم بارەوە ووتی: سلێمانی لەو کاتەدا بە شێوەی ئاشکرا سەرقاڵی بەرنامە داڕشتن و فەرماندەیی هێزەکانی سپای قودس و گرووپە تێرۆریستییەکان بۆ کوشتنی هێزە ئەمریکاییەکان لە عێراق‌دا بوو. ئەو گەڵاڵەی کە سولەیمانی لە کاتی هاتنەوە لە بەیرووت و دیمەشق بۆ بەغدا دایڕشتبوو، ئەگەر بە ئاکام گەیشتبا، خەڵکێکی زۆری ئەمریکی دەبوون بە قوربانی سیاسەتە گڵاوەکانی کۆماری ئیسلامی.
ئەم بابەتە 11989 جار خوێندراوەتەوە