پەیامی کورد      ...   پێنتاگۆن نیگەرانی خۆی دەربارەی هێرشەکان بۆ سەر سەربازانی ئەمریکی لە عێراق و سووریا دەربڕی .

وەزارەتی بەرگری ئەمریکا " پێنتاگۆن " سەبارەت بە هێرشکردن بۆ سەر سەربازانی ئەمریکی لە عێراق و سووریا لە ڕۆژانی ڕابردوودا نیگەرانی خۆی دەربڕی و پێنتاگۆن ڕایگەیاند ، لەو هێرشانەی کە دەکرێتە سەر هێزەکانیان لە عێراق و سووریا بە تووندی نیگەرانە .

ووتەبێژی وەزارەتی بەرگری ئەمریکا رایگەیاند، ئەو هێرشانەی لەم ڕۆژانەی دواییدا لە عێراق و سووریا لەلایەن چەند لایەنێکی چەکداری نزیک لە ئێران ئەنجامدراون، هەڕەشەیەکی جیددییە، زۆر نیگەرانن لەو زنجیرە هێرشانەی کە سەربازانی ئەمریکا دەکاتە ئامانج.

جۆن کێربی، ووتەبێژی وەزارەتی بەرگریی ئەمریکا شەوی رابردوو لەمیانی ووڵامی پرسیاری کەناڵی "الحدث" لەبارەی هێرشی گرووپە چەکدارەکان لە عێراق و سووریا ڕایگەیاند : "چەکی کوشندە بەکاردەهێنن، نازانم چ شتێک بڵێین جگە لەوەی ئەمە هەڕەشەیەکی مەترسیدارە".

ئاماژەی بەوەشکرد، ئەمریکا بە قووڵی لەو هێرشانە نیگەرانە و بە هەڕەشەیەکی جددیان دادەنێت، "ئێمە خۆشحاڵبووین کە لە هێرشەکەی رۆژی چوارشەممە تەنیا دوو کەس بە سووکی برینداربوون".

ئەمە لە حاڵێکدای کە تەنیا ڕۆژی چوارشەممە دیپلۆماتەکان و سەربازان لە عێراق و سووریا بە سێ هێرشی مووشەکی و فڕۆکەی بێفڕۆکەوان کراونەتە ئامانج و لانیکەم بە ١٤ رۆکێت هێرشکرایە سەر بنکەی ئاسمانی عەین ئەسەد لە ئەنبار و دوێنێ پێنجشەممەش هێرشکرایە سەر ناوچەی سەوزی بەغدا و پێشتریش هێرشکرابوە سەر کێڵگەی نەوتی ئەلعۆمەر لە دێرەزور.

هێرشەکان لەکاتێکدایە تا ئێستا هیچ لایەنێک بەرپرسیاریەتی خۆی لەو هێرشانە ڕانەگەیاندوە، کە بەشێک بوون لە شەپۆلێک لە هێرش بۆ سەر سەربازەکانی ئەمریکا یان ئەو ناوچانەی کە تێیدا جێگیربوون، هەم لە عێراق و هەم لە ڕۆژهەڵاتی سووریا، بەڵام شرۆڤەکاران پێیانوایە هێرشەکان بەشێکن لە هەڵمەتێک کە لە لایەن ژمارەیەک چەکدارەوە دەستی پێکردوە لەلایەن ئێرانەوە پشتیوانی دەکرێن.

ئەم بابەتە 11988 جار خوێندراوەتەوە