پەیامێکی گرینگ لە مەسروور بارزانی سەرۆکی حکوومەتەوە " ئێمه سواڵكه‌ر نین، ئێمه داوای ئه‌و مافه ده‌كه‌ین كه به پێی ده‌ستوور مافی ئه‌و خه‌ڵكه‌یه "
پەیامی کورد ... پەیامێکی گرینگ لە مەسروور بارزانی سەرۆکی حکوومەتەوە " ئێمه سواڵكه‌ر نین، ئێمه داوای ئه‌و مافه ده‌كه‌ین كه به پێی ده‌ستوور مافی ئه‌و خه‌ڵكه‌یه " .
مەسروور بارزانی سەرۆکی حکوومەتی هەرێمی کوردستان سەبارەت بە گرفتی مووچە و چۆنیەتی دابینکردنی پەیام و زانیاری گرینگ بڵاو دەکاتەوە " ئێمه سواڵكه‌ر نین، ئێمه داوای ئه‌و مافه ده‌كه‌ین كه به پێی ده‌ستوور مافی ئه‌و خه‌ڵكه‌یه "
مه‌سروور بارزانی سه‌رۆكی حكوومه‌تی هه‌رێمی كوردستان، له‌میانه‌ی په‌یامێكدا به‌بۆنه‌ی دوو ساڵه‌ی متمانه‌دان به‌كابینه‌ی حكوومه‌ته‌كه‌ی رایگه‌یاند، "تووشی قه‌یرانێكی دارایی بووین و خه‌ڵك هه‌مووی چاوه‌ڕێی ئه‌وه‌یه مووچه له‌سه‌ری مانگه‌وه بدرێت، حكوومه‌تیش به‌ڵێنی ئه‌وه‌ی داوه كه به‌و بوودجه‌ی به‌رده‌سته مووچه بدات.
مه‌سروور بارزانی له‌وتارێكدا به‌بۆنه‌ی تێپه‌ڕبوونی دوو ساڵ به‌سه‌ر متمانه‌دان به‌كابینه‌ی نۆیه‌می حكومه‌ت رایگه‌یاند، "له‌سه‌ره‌تای به‌رنامه‌ی كابینه‌كه‌ماندا به‌ڵێنمانداوه كه خه‌ریكی چاكسازی ده‌بین، به‌ڵام چاكسازی شتێك نییه به شه‌و و ڕۆژێك ته‌واو ببێت، به‌ڵكوو پڕۆسه‌یه‌كی به‌رده‌وامه و قه‌ت ته‌واو نابێت، ئێمه هه‌رچی بكه‌ین ده‌توانین چاكسازی بكه‌ین له داهاتوشتدا ئه‌وه‌ی تا ئێستا حكومه‌ت كردویه‌تی ئه‌گه‌ر به ئینسافه‌وه سه‌یری بكه‌ین دوای ئه‌و هه‌مو قه‌یرانه‌و له‌گه‌ڵ ئه‌و هه‌مو كێشه‌و گرفتانه‌ی كه تووشی حكومه‌تیش بو، پێموایه حكوومه‌ت ده‌ستكه‌وتی زۆری به‌ده‌ستهێناوه، سه‌ره‌ڕای ئه‌وه‌ش ته‌حه‌دیات زۆر بوه، هه‌ر دوای ده‌ستپێكردنی كابینه تووشی قه‌یرانی كۆرۆنا بووین و نرخی نه‌وت دابه‌زی و ئابووری دونیا به شێوه‌یه‌كی گشتی تووشی داڕمان بوو، سه‌ره‌ڕای ئه‌مه‌ش توانیمان خۆمان ڕابگرین، به‌لایه‌نی كه‌میشه‌وه نزیكه‌ی 13 مانگه حكوومه‌تی فیدراڵ هیچ پاره‌یه‌كی بۆ نه‌ناردوین".
وتیشی، "ئێمه به‌و داهاته‌ی له هه‌رێم هه‌بوه و به‌و هه‌مو كێشه و گرفتانه و به‌و هه‌مو قه‌یرانه‌ش توانیومانه ئیداره‌ی ئه‌م هه‌رێمه بكه‌ین و چاكسازیشمان له چه‌ندین بواردا كردوه بۆ نمونه له ڕێكخستنه‌وه‌ی داهاته‌كان و كه‌مكردنه‌وه‌ی خه‌رجییه‌كانی حكومه‌ت كه به‌شێوه‌یه‌كی به‌رچاو دیارن، توانیومانه خۆمان بگونجێنین، له‌گه‌ڵئه‌وه‌ی كه له‌به‌رده‌ستبوه".
ئه‌وه‌شی خسته‌ڕوو، "حكوومه‌ت هه‌وڵی به دیجیتاڵكردنی خزمه‌تگوزاری بۆ خه‌ڵك داوه و له لایه‌كی تره‌وه ڕۆتینیات تا ئاستێكی زۆر كه‌م كراوه‌ته‌وه، له هه‌موشی گرینگتر ئه‌وه‌یه كه ئه‌و گه‌نده‌ڵیه‌ی پێشتر خه‌ڵك پێیه‌وه ده‌یناڵاند و گله‌ییان ده‌كرد له به‌هه‌ده‌ردانی سامانی گشتی، به‌شێوه‌یه‌كی گشتی ده‌توانم بڵێم تا ئاستێکی زۆر كه‌م كراوه‌ته‌وه، به‌ڵام ناتوانم بڵێم به ته‌واوه‌تی بنبڕ كراوه".
روونیشیكرده‌وه، "هاووڵاتیانی كوردستان پێیان وایه كه باجیان له‌سه‌ر زیاد كراوه، ئه‌مه له كاتێكدایه كه حكوومه‌ت پێی وایه باج ته‌نیا ڕێكخراوه‌ته‌وه و زیاد نه‌كراوه و به‌م رێكخستنه و دانانی سیستمێكی هاوسه‌نگی باج كه ئامانجی خزمه‌تكردنی به‌رژه‌وه‌ندی گشتی بێت، داهاتی ناوخۆ زیاتر له 50 زیادی كرد، به‌ڵام به هیچ شێوه‌یه‌ك باجمان زیاد نه‌كردوه له‌سه‌ر خه‌ڵك، به‌ڵكوو ئه‌و باجانه‌ی كه هه‌یه به یاسا ڕێكخراوه‌ته‌وه.
مه‌سروور بارزانی راشیگه‌یاند، چه‌ندین هۆكار هه‌ن بۆ كه‌مبوونه‌وه‌ی ئاو له كوردستاندا، زۆر له‌و سه‌رچاوه ئاویانه‌ی كه له ده‌ره‌وه‌ی هه‌رێمی كوردستان ده‌هاتنه هه‌رێم ئێستا ڕێگه‌یان لێ گیراوه و ئه‌و ئاوی زۆر نگاته به‌نداوه‌كانی وه‌ك دوكان و ده‌ربه‌ندیخان ئه‌مه له لایه‌كه‌وه، ووشكه‌ساڵی و كه‌مبارانی هۆكارێكی تره بۆ كه‌مبوونه‌وه‌ی ئاو، هه‌روه‌ها مامه‌ڵه‌ی ناته‌ندروست له‌گه‌ڵ ئاوی ژێرزه‌وی كراوه تا ئێستا و ئاوێكی زۆر به فیڕۆ دراوه، به‌ڵام چۆنیه‌تی چاره‌سه‌ری ئه‌وه‌یه كه ده‌بێت ئێمه ده‌ست به‌م ئاوه‌وه بگرین و ئه‌مه‌ش به‌شێكی ده‌گه‌ڕێته‌وه سه‌ر به‌رپرسیاریەتی هاووڵاتیان.
سه‌رۆكی حكوومه‌تی هه‌رێم ئه‌وه‌شی ئاشكراكرد،"تووشی قه‌یرانێكی دارایی بووین و خه‌ڵك هه‌مووی چاوه‌ڕێی ئه‌وه‌یه مووچه له‌سه‌ری مانگه‌وه بدرێت، من ده‌توانم ئه‌وه بڵێم كه حكوومه‌ت به‌ڵێنی ئه‌وه‌ی داوه كه به‌و بوودجه‌ی به‌رده‌سته مووچه بدات، ئێمه پێمان خۆشبوو مووچه هه‌مووی بدرایه، به‌ڵام ئه‌و بوودجه‌ی كه به‌رده‌سته به‌شی ئه‌و هه‌موو پڕۆژانه ناكات له‌به‌رئه‌وه پێویسته ئێمه بڕیار له‌سه‌ر ئه‌وه بده‌ین چۆن ده‌توانین به‌باشترین شێوه سوود له‌و بوودجه‌ی به‌رده‌سته وه‌ربگرین و چه‌ندی بۆ مووچه بگه‌ڕێته‌وه و چه‌ندی بۆ پرۆژه‌‌كان خه‌رجبكرێت".
له‌باره‌ی ئابووری هه‌مه‌جۆریشه‌وه، مه‌سروور بارزانی ووتی، "ده‌مانه‌وێت ئابووری خۆمان هه‌مه‌چه‌شن بكه‌ین، بۆ ئه‌وه‌ش ده‌ستمان كردوه به‌وه‌ی په‌ره به كه‌رتی كشتوكاڵی و كه‌رتی پیشه‌سازی و گه‌شتوگوزار بده‌ین، به‌ڵام دیسانیش ده‌ڵێم شته‌كان پێكه‌وه به‌ستراونه‌ته‌وه، ئه‌گه‌ر بوودجه له‌به‌رده‌ست نه‌بێت له‌وانه‌یه ئاسان نه‌بێت تۆ زو په‌ره به‌و كه‌رتانه بده‌یت".
له‌باره‌ی په‌یوه‌ندیه‌كانی هه‌ولێر و به‌غدا، مه‌سرور بارزانی وتی، "ئه‌م كابینه‌یه زیاتر له هه‌مو كاتێك شاندی ناردوه بۆ به‌غدا و له‌سه‌ره‌تاوه خۆم چوم و دوای ئه‌وه شاندی حكومه‌تی هه‌رێم چه‌ندینجار چونه‌ته به‌غدا بۆئه‌وه‌ی بگه‌نه ڕێككه‌وتن هه‌م له‌سه‌ر بابه‌تی بودجه و هه‌م له‌سه‌ر ئه‌و بابه‌تانه‌ی تر كه كێشه‌یان له‌سه‌ره وه‌ك ناوچه كوردستانییه‌كانی ده‌ره‌وه‌ی ئیداره‌ی هه‌رێمی كوردستان و یان بابه‌تی پێشمه‌رگه و زۆر بابه‌تی تر كه ئه‌و شتانه‌ن هێشتا له ده‌ستووردا هه‌ن و به‌داخه‌وه تا ئێستا جێبه‌جێنه‌كراون، ده‌ستپێشخه‌ری زۆرمان كردوه له هه‌مو ئه‌و بوارانه‌دا و چووینه‌ته به‌غدا و داوامان كردوه و هه‌موو ئاماده‌گییه‌كی هه‌رێمی كوردستانمان پیشان داوه و هه‌رچی ئه‌ركێكی سه‌ر شانی هه‌رێمی كوردستان بوبێت ئاماده‌ین جێبه‌جێی بكه‌ین، به‌ڵام له هه‌مانكاتیشدا ده‌زانین ئه‌گه‌ر ئه‌ركمان هه‌بێت مافیشمان هه‌یه، به‌ڵام به‌داخه‌وه تاوه‌كو ئێستا ئێمه ئه‌ركه‌كانمان جێبه‌جێكردوه، به‌ڵام مافه‌كانی خۆمان وه‌رنه‌گرتوه‌ته‌وه له حكوومه‌تی فیدراڵی كه مافێكی ده‌ستووری ئه‌م خه‌ڵكه‌یه".
مه‌سروور بارزانی ئه‌وه‌شی وت، "ئێمه داوای شتێك ناكه‌ین، ئێمه سواڵكه‌ر نین، ئێمه داوای ئه‌و مافه ده‌كه‌ین كه به پێی ده‌ستوور مافی ئه‌و خه‌ڵكه‌یه و ده‌بێت جێبه‌جێبكرێت، له باره‌ی پێشمه‌رگه و ناوچه دابڕێندراوه‌كانیش به‌هه‌مان شێوه ده‌ستپێشخه‌ریمان كردوه و وتومانه كه پێشمه‌رگه ئاماده‌یه و پێویسته بۆ دابینكردنی ئاسایشی ئه‌و شوێنانه هه‌ماهه‌نگی بكرێت له نێوان هێزه‌كانی هه‌رێمی كوردستان و هێزه شه‌رعییه‌كانی حكومه‌تی عێراق و له‌سه‌ر ئه‌مه‌ش له گفتوگۆداین و شاندی ئێمه دیسان سه‌ردانی به‌غدا ده‌كه‌نه‌وه بۆ ئه‌وه‌ی بگه‌نه ڕێككه‌وتنێك كه له به‌رژه‌وه‌ندی ئاسایشی گشتی وڵاته‌كه‌دا بێت".
ئەم بابەتە 11989 جار خوێندراوەتەوە