وەزیری دەرەوەی تورکیا رایگەیاند، گەشەی ئابووری و بازرگانی ناکرێت جێبەجێ بکرێت، ئەگەر بێت و ئەو ئاڵنگاریانەی کە لەناو عێراقدا هەیە بمێنێتەوە بەتایبەتی ئاڵنگاری گرووپە چەکدارەکان، کە کێشەیەکی زۆر درووست دەکەن بۆ عێراق و ناوچەکە، دەشڵێت، "ئێمە قبووڵ ناکەین پەکەکە لەم ناوچەیە هەبێت و ببێتە هەڕەشە بۆ تورکیا، ئێمە پاڵپشتی تەواوی خۆمان ئاڕاستەی عێراق دەکەین بۆ ئەوەی پەکەکە لە عێراق نەمێنێت".
مەولوود چاووش ئۆغلو، وەزیری دەرەوەی تورکیا ئەمڕۆ شەممە (٢٨ی ئاب) لەمیانەی ووتارێکدا لە لوتکەی بەغدا بۆ هاریکاری و هاوبەشی رایگەیاند، "لە ساڵی ٢٠٠٣ ئێمە سەرۆکایەتی کۆبوونەوەیەکی بەرفراوانمان کرد لەسەر ئاستێکی باڵا بۆ ئەوەی کە بتوانین سەقامگیری عێراق بپارێزین، وەکو لە چۆن هەوڵماندا پاڵپشتی لە عێراق بکەین بەهەمانشێوە ئەمڕۆش پشتیوانی دەکەین، عێراق برای ئێمەیە و هەموومان ئەمە باش دەزانین ئەگەر بێت و عێراق سەقامگیر نەبێت هیچ کەسێک ئاسودە نابێت لە ماڵی خۆی و بە ئاسوودەیی لە ماڵی خۆی دانانیشێت و خۆشگوزەران نابێت".

ئاماژەی بەوەشکرد، ئەرکی سەرشانی ئێمە ئەوەیە کە بەهەموو شێوەیەک عێراق بپارێزین و سەقامگیرییەکانی بپارێزین، عێراق بۆ ئەوەی کە لە ژێر دادپەروەریدا بژی داوای خۆشگوزەرانی دەکەن، ئەم حکوومەتەی ئێستا کە کازمی سەرپەرشتی دەکات و بەڕێوەی دەبات بە هەمو شێوەیەک هەوڵەکانی خۆی چڕکردوەتەوە بۆ ئەم ئامانجانە، تورکیا بەهیچ شێوەیەک جیاکاری لەنێوان هیچ پێکهاتەیەکی ئەم ووڵاتە نەکردوە، بۆیە هەر لەم چوارچێوەیەشدا بەتایبەتی سەرۆکمان هەموو ئەو بیرۆکانە پاڵپشتی لێدەکات و هەوڵەکانی بۆ ئەوەش چڕ دەکاتەوە".

چاووش ئۆغلو باسی لەوەشکرد، "ئێمە لە چوارچێوەی ووڵاتێکی دراوسێ بەهەمو شێوەیەک پاڵپشتی براکانمان لە عێراق دەکەین، لە هەمان کاتدا تورکیا توانیویەتی لەم چوارچێوەیەدا لە ریزبەندی یەکەمی ووڵاتان بێت کە هیچ کاتێک پشتی لە عێراق نەکردوە، تورکیا بە هەموو شێوەیەک هەوڵ دەدات بازرگانی و ئابوری خۆی لەگەڵ عێراق بەهێز بکات و دەیەوێت دەروازەی سنووری زیاتر بکاتەوە لە رووی ووشکانی و هێڵی ئاسنین و دامەزراندنی ناوچەی پیشەسازی لە موسڵ و جێبەجێکردنی بەنداوی زۆر گەورە، ناکرێت هەموی بە یەکجار جێبەجێ بکرێت بەڵکو هەنگاو بە هەنگاو هەوڵی بۆ دەدرێت، بۆ ئەمەش زۆر پێویستمان بەوەیە سەقامگیری ئەم وڵاتە بپارێزرێت و پێکەوە دەست لەناو دەست بنێین".

ئەوەشی خستەڕوو، "گەشەی ئابووری و بازرگانی ناکرێت جێبەجێ بکرێت، ئەگەر بێت و ئەو ئاڵنگاریانەی کە لەناو عێراقدا هەیە بمێنێتەوە بەتایبەتی ئاڵنگاری گرووپە چەکدارەکان، کە کێشەیەکی زۆر دروست دەکەن بۆ عێراق و ناوچەکە، ئێمە باش دەزانین کە گروپەکان داعش و پەکەکە و گولەن کێشەیەکی زۆریان درووستکردوە لەم ناوچەیە، ئێمە قبوڵ ناکەین پەکەکە لەم ناوچەیە هەبێت و ببێتە هەڕەشە بۆ تورکیا، ئێمە پاڵپشتی تەواوی خۆمان ئاڕاستەی عێراق دەکەین بۆ ئەوەی پەکەکە لە عێراق نەمێنێت".
لوتکەی بەغدا بۆ هاوکاری و هاوبەشی بە بەشداری ٩ ووڵات دەستیپێکرد، لەوتاری دەستپێکدا مستەفا کازمی، سەرۆک وەزیرانی عێراق رایگەیاند، عێراق لە قۆناغی رابردوودا لەسەر ئاستی جیاواز رووبەڕووی کێشە و گرفتی گەورە بوەوە، بەڵام توانی هەنگاوی فراوان بنێت بۆ تێپەڕاندنی ئەو ئاڵنگارییانە بنێت.
عێراق لە دوای 2003ـەوە یەکەمجارە کە لوتکەیەکی بەو ئاستە فراوان بەڕێوەببات، ژمارەیەک لە ووڵاتانی بەشدار جگە لە چالاکییەکانی لووتکەکە کۆبوونەوەی دوو لایەنەشیان لەگەڵ یەکتردا دەبێت.